فراغ

صُب السؤال

في كاسات اجابه مؤكده

و ابعت مع الصدق الكلام

كدبك شجر ناقص فروع

مين اللي ساب ازلام فراغك تِنتِفِض

فوق كف تمثال من خضوع

دوس الساعات ع الوقت بالضيق المميت ؟

ولا انقسام صورتك لفصلين م الخريف

ولا الطريف المصطنع من حد قاطع للملل

......

سيكولوجيا النفس عبد

بيشق سترة الحلم البعيد قبل الركوع

و الفرض حاله من القلق

دخان مناير حسبته

لطخ وشوش صوت الخيال

طمّع مواقيت الوداع

تسكن شوارع محنتك

ترسم بافكارك حارات

ضاقت على صفين ملايكه بيطلبو

روحك تتوب

بدلت ليه ؟ جامع طلوعك للحياه

بكاسين عبط نسوك طريق المبتدأ

لضموك بخيط فكر الشريد

و باعوك على انك مُطيع

او تستطيع تنزف نكت

ملهاش معاني ع الملأ

صُب السؤال

في كاسات اجابه مؤكده

انت اللي هارب م الحياه ؟

ولا الفراغ خلاك تقولها بصيغه بس مؤدبه

فلان الفلاني

فلان الفلاني
تحيه و سلام
سايبنا نعاني
و عيشتك تمام
ضميرك سواقي
و حلمي اللي باقي
مجرد كلام
تلفلف فـ روحنا
و بتصيب جروحنا
بـ 100 انهزام
فلان الفلاني
ياريتك تشوف
حكاوي انقسامنا
في اصعب ظروف
رصيف انتظارنا
بيرسم قدرنا
و بكره اللي راجع
بماضي المواجع
بيملانا خوف
فلان الفلاني
بصدق و امانه
ايه اللي جابرنا
نحب الاهانه
انا و قلبي لازم
نحقق في حلمك
و بكفايه ظلمك
طريق السلامه
فلان الفلاني
يا قلب اللي كانت
طريقي و مصيري
دموعي اللي هانت
على قلب غيري
رضينا بقدرنا
و كل اللي بيننا
مشاعر و ماتت

رصيدي خِلِص

كل الناس عاملين دوشه
و ما بينهم فيه حكايات
نازلين مع بعض مناقشه
في كلام فاضي و حوارات
و انا عامل نفسي عبيط
و اخترت العيشه الاسهل
ما بقيتش بطل حواديت
ولا داري باللي بيحصل
معلش رصيدي خِلِص
ما بقيتش اهتم بحاجه
ولا هازعل يوم و اتقمص
و هابطل اعيش في سذاجه
بنلاقي كتير اصحاب
علشان الجيب مليان
لكن اول ما نفلس
كله على اصله يبان
انا لما في يوم حبيت
كات هيّ حياتي و بس
عمري ما دورت و لفيت
ولا يوم قلبي كان تاكس
اتاريها اتوبيس زحمه
علشان تزكرته رخيصه
بتبيع مشاعرها فـ كلمه
لقلوب شياطين و خبيثة
معلش رصيدي خِلِص
ما بقيتش اهتم بحاجه
ولا هازعل يوم و اتقمص
و هابطل اعيش في سذاجه

من غير برواز

و حاجات فـ الدنيا بننساها
بالقصد تماماً و العنوه
و بنرشي الروح علشان تِقبَل
بالضحكه المليانه تعاسه
و غلاسه كمان بنموت صاحيين
و بندفن روحنا فـ تزويقها
علشان ناقصين
احلام تدينا الحريه من غير شُبوهات
كام واحد مات كان نفسه يموت
كل الاموات مالهمش رصيد
و الجنه خلاص شبه التوابيت
و النار اوسع
بتلم بقايا المنتفعين من عُهر الذات
و حاجات بنعيشها يادوب حكايات
ابطالها سنين من كتر ذنوبها بقت ايام
و الوقت اختل
و الحل مريض و بداء الذل
كاسر فـ العين النور و الضل
و الشوف بالصوت العالي حياه
بنخوِف بيها المستقبل
يمكن يقبل بالماضي صديق
و حاجات في طريق اللقا ضلِت
حضنِت فـ جروح و طموح ناقص
من غير برواز
سابت خطاوينا بعيد سافرت
على دنيا ازاز
فتارين للاحلام ع النوته
او حتى مجاز
و حاجات إدمان لو يوم ماتت
بنموت م القسوه و م الحرمان
زيِّك كده لما 
طويتي الحب فـ نن فراقك و بعدتي

ارحلي ... قصيدة بالفصحى

بعثري اوراق حبي و انثريها كلما
جاء قلبي يزف شوقاً منهزم
يغزل الاقمار دُراً حول جيدك طالباً
هدنةً تحمي كلينا من صراعٍ محتدِم
اوقدي تنورَ عزمِكِ و اثبُتي لا تضعُفي
لم يعد في البَين الا طود حزن مُنصرِم
هذه اوثان خوفك فاكسريها و ابرأي
من تدني قيظ شمسك خلف بحرٍ منقسِم
و احملي ثوب الرجوع بلا خضوعٍ و ارحلي
ان لي روحاً و لكن ذات حسٌ مُنتقِم
و اقتلي حلماً يطوف في خيالكِ راجياً
سُدّة الحب الرغيد بالحنينِ المُنسَجِم
هذه صيحاتُ قلبكِ فاتركيها و ارقُصي
رقصة المذبوح يأساً من خلاصٍ مُنعدِم
ان بنيتِ الف صرحٍ للغرامِ سأفسده
رافعاً عَلَمَ العناد بزيف حرفٍ مُضطرِم

ايه خلاني ... اغنيه

انا ايه خلاني اتجن
و اعيش فـ الدنيا بريئه
مش كنت اعيش احسن
بضمير الوانه جريئه
ولا كنت فـ يوم راح اضيع
ولا افكَّر اني ابيع
قلبي عشان راحِة نَفسي
لغرام او قلب وضيع
دي عيون الناس مرايات
للماضي و للحكايات
اللي بتهدِم فـ حياتنا
و تِزوِّد فـ الازمات
...
انا ايه مشاني طريق
مافيهوش احساس ولا شوق
ده اللي انا فكرته صديق
كداب و فـ نيِّتُه سوء
و فاكرني بكل سهوله
طفله و لسه فـ سنه اولى
تعشق على طول و تِسلِم
لمشاعر مش مسئوله
بس انا مابقيتش خلاص
من قلبي يفيض إحساس
علشان اضعَف من كِدبَه
او كُتر كلام الناس

مالناش غيرِك .. أغنيّه

كل الخاينين أصلاً تافهين
بيقلدوا شكل البني ادمين
مالهُمش وطن ولا ليهم دين
و الباطل ساكِن افعالهُم
ظالمين حاقدين عايشين بيننا
و بيهدموا دايماً احلامنا
فاكرين المغفره و الجنه
ليهُم و احنا الشياطين بينهُم
...
يا بلادنا يا صوره و مقلوبه
يا دموع الدم المكتوبه
و الحق اسير
شدي فـ اجزاء حبِك لينا
و اضربي كاام احساس يجمعنا
حواليكي بخير
اصلنا عاشقين فيكي و دايبين
مهما بيحصل دايما راضيين
مالناش غيرك مهما نروح فين
ولا شيء في الدنيا يفرقنا
يا اصيله و حبِك فينا اكيد
يا حقيقه برغم الزيف و الكيد
يا جميله و عنداً في المناكيد
نفديكي يا غاليه بأرواحنا

رسول مالهوش في الوحي

قادر لسه تعيش مع انك

جوه كلام الناس اوهام

او حواديت بيخوِفوا بيها

صوت الضحكه فـ قلب الحزن

ماتقوليش فاتِح شبابيك على بكره الجي

و ان ضميرك بياكدلك 

انك كل ما بتموت حي

و ان الطيب لازم يغلب

كل دموع الخوف فـ عيونهم

ماتبروزش حقايق ماتِت

و تعيش بيها فـ زمن الزيف

طول ما السيف عمّال بيحايل

نبض خشوعهم

قادر لسه تعيش مع انك

سكه اخرها الشط الحاير

بين الشوف بالعدسه الفالصو

و بين مجاديف التيه و البُعد

عارف ان الحلم ده دنيا

و انت بطلها و قلبك ثاير

على احوال الناس فبتصبُر

يمكن تِوضَع ليهم حَد

بس زمان الانبيا ولى

و انت رسول مالهوش فـ الوحي

مش بايديك توعِد بالجنه

لو طاوعوك و ادولك وعد

اصعب شيء

اصعب شيء في الدنيا خلاف
بين اتنين احلامهم واحده
و ان الحب فـ مره يخاف
يجمع بينهم حتى فـ حلم
و ان الموت يسرقهم قبل الصدفه البحته
و ان مسلسل عدل حياتهم ..
يقلب ظلم
اصعب شيء في الدنيا تضيع
كل مراكب عشقك غصب
وسط بحور الخوف من بكره
او بشعور مبني على الكدب
 تلقى شوارع روحك ضلمه
و تبقى طريد حتى الاوهام
اصعب شيء في الدنيا صديق
كان بيصلي بروحي امام
كنت القاه فـ التوهه طريق
وسط الوحده بيبقى الناس
بس اساس دنيتنا فراق
غربه و موت و خلاف على حب
لما البنت بتظهر فجأه
بين صديقين تقلبها لحرب
اصعب شيء في الدنيا الدنيا
لما بتديك مقلب و انتَ
لسه بتضحك رغم الغُلب

لإنِك بريئه

لإنِك بريئه و ضميرك اُحادي
ما يقبلش قسمه و ما له احتمال
غير إنِك مواني و مدّه الايادي
على الكُل خيرك و من غير سؤال
لذلك وهبتِك مجامع حياتي
و نبض إنفعالي و فرح السنين
اسيرِك بخاطري و سيرك مصيري
خطاوي يزينها رضاكي بحنين
لإنِك فريده و مالِك مثيل
بتكره عيوني تشوف حد غيرِك
تِحني تِضني كتير او قليل
بتفضَل سعادتي و بيزيد جميلِك
...
كفرت بملامِح دموعِك ليلاتي
على ضل كاسِر شموسِك بليل
لإنِك بريئه و ضميرِك اُحادي
بيصعب عليكي ذنوبهم تسيل
فتغسِل براءتِك تميمِة شرودهُم
عساهُم يقابلوا جميلِك بخير
و يمحوا فـ غشاوة عيونهُم بخيل
يسابِق مجونهُم لجنه و خلاص
و حقك عليهم يزينوا المنابر
بإسمِك لإنِك لنورهم اساس
...
لإنِك بريئه و ضميرِك حَسَن
بتنسي اللي خانِك مجازاً عشان
وصولِك لغايتِك برغم المِحن
بيدي اللي حبِك سكينه و امان

شعور كاروهات

ما بين العكس و المظبوط
حاجات بتكون رماديه
ساعات تبقى لحلمنا قوت
و قشه فـ وسط دوامه حياتيّه
مثالاً كِدبِتي البيضه
ما بين اتنين مخاصمين بعض
و مبروك لما بنقولها
لناجح بس مجموعه ..
يادوب خمســ50%ــين فـ الميّه
نِفاق يمكن ماهوش مقصود
عشان نِقدَر ..
نِكمِل في الحياه سكه بدأناها
هروب م الوحده دي الصُحبه
بتزرع فينا صبر عجيب
على الغربه اللي عِشناها
و بتعيشها بسوء نيّه
ما بين العكس و المظبوط
حاجات بتكون رماديّه
لاهي ابيض ولا اسوِد
ده شيء جوانا مِتعوِد
يصدَق كِدبِته يمكن ..
يطبطب بيها ع الاحزان
فتتغيَّر لحنيّه

إنسان خُرافي

تِغني و ترقُص و تضرب ودَع

و تفرش عيونَك بدمع الشموع

ليالي بتهرب في حضن الوجع

و تضحك لإنك ما تعرف دموع

تحب السهر و روحَك نجوم

كإنَك قمر بيعزِف سحاب

و تمنع بشوقك خطاوي الغيوم

لَتفرِد ظنونها في قُربَك غياب

بريئه إبتسامتَك و صوتَك نَغَم

و صورتَك راسمها بِضي الحياه

في وقت إنكِسارَك بتنسى الالم

كإنَك مراسي و مراكِب نجاه

بحورَك قصورَك بتشبه بنات

في عِز إنفعالها بتنزِف حنان

و لما بتحلَم بوقت الممات

بتبني فـ مداين صمودَك امان

غريبه الحياه في حضنَك وطن

برغم ان كونها لغيرَك عذاب

ضميرَك بيصحى و يِكسَر وَثَن

كإنه إلتجأ لربه و تاب

تِرُد الإهانه بنهرين قلوب

هديه و محبه في وقت التجافي

لإن اللي زيّك مالوش في الذنوب

لِذلِك يُصَنَف بإنسان خُرافي

حقيقة بتكره التزييف

عيونِك ليل فـ حضن الشمس

و كااام نجمه بتتوضا

بدمع خريفِك النعسان ..

في كف الصيف

يا نور ولهان بضي عيوني لو يلمح

شرود بردِك مِدفيني

و حنيني اللي ما يقدر على بُعدِك

و لو تخاطيف

يا نبض الحلم فـ عيوني

يا كل حقيقة في الدنيا

يا محض الصدفه و المقصود

شفايفك ناي و عزفة عود

بيوهبوا روحي لكياني

و شوق ممدود

يطبطب ع الوجع يبقى

فـ حضن الذكريات ارشيف

عيونِك ليل طريد الوحده و الخنقه

و سكة خوفي م الغربه

عيونك حته م الجنه

حقيقه بتكره التزييف

عيونك طوق و قلبي غريق

في بحر المستحيل مدي

ايادي الممكنات لضعيف

و هزي بضحكتك بُعدي

يغنيلك شجر وردي

مراكب تِوصِل الممنوع

عيونك طوع لقبطان الحياه لما

برغم الموت ..

بيدي الامر بالتجديف

إنفصام

كإنِك شيء 
ماهوش مِلكي ولا ممنوع
و مش مكتوب على غيري 
يشوفِك فرح او في دموع
كإنِك نبض جوه الموت
و خطوه في طريق مفقود
و زي المستحيل السهل
و محروم رغم حضن الاهل
و شبعان بس مات م الجوع
تعبت و فيكي ياما احترت
لكن برضو انا اللي اخترت
اصدّق فـ إنفصام ذاتك
و صبيت عمري فـ حياتِك
لقيتك ضدي و معايا
و فرح و حزن جوايا
و لحظة كدب وسط خشوع
ياريتك ترسي يوم على بر
ماهياش حرب كر و فر
و انا فيها اسير ليكي
و بكفايه انفصام فـ الروح
في وقت دوايا تبقي جروح
تزيد من يأسي يوم فيكي
و بُعدي يبقى ماله رجوع
كإنِك شيء
ماهوش مِلكي ولا ممنوع

مكياج احساسنا

مكياج احساسنا ماهوش نافع
ولا حتى الروج داب في شفايفه
مع اول ضحكه يروح طالع
و اكمنه رخيص ..
كان دايما يهرب م المرايات
و يبان في حقيقته كما الموميا
مكياج احساسنا يادوب ثانيه
و بيبقى فتات
بلياتشو بيضحك من حزنه
مضطر يكمل دوره عشان
كل ما بيمثل دور كوميدي
يدارى فـ قلبه من الاحزان
بلياتشو جبان جداا لكن
مكياج احساس الناس اجبن
و لذلك مات !!

امنت بكل شيء فيكي

امنت بحُضنِك الساحر
و نبضك لما يتااخِر
و ياخد دنيتي جنبه
امنت بكل تفكيرك
و شكلك لما بيسيبك
و يرسم شوقي فـ ملامحه
مانيش كافر عشان انسى
بلاد حبي اللي فـ عيونِك
دنا واحد يادوب لسه
بيتهجا الحياه بصوتك
امنت بكل شيء فيكي
لان المستحيل بيكي
مالوش جوايا اي مكان
امنت بكل ازماتِك
و فرحِك حتى و سُكاتِك
حبيبتي الدنيا بيكي امان
مانيش كافر ولا جاحد
عشان اشكي في يوم منِك
تهوني ازاي و انا ساجِد
على بساط الحنان جنبِك

فتافيت

بنسامح بعض لكن دايما بنشيل فتافيت
من مشكله كانت يوم بينا او عند غتيت
و نموت مع اول تنهيده من بحر عتاب
علشان النيّه كانت واخده من حُزننا بيت

حبينا و كانت احلامنا بتموت اوقات
من خوف جوانا مالوش لازمه من غير حسابات
و ان قولنا ثواني و راح يرجع قلبنا ملهوف
بنلاقي الخوف هلب و مرسى على بحر آهات

جايز نتغيَّر و ساعتها حنكون اوراق
في كتاب ايامنا المنسيّه من غير اشواق
و كلام مسجون جوه قلوبنا مش لاقي طريق
لو صدفه انا و انتَ إتجمعنا من بعد فراق

فصبراً

لإنِك فرحي فـ الآخر

ماحبتشي ابيعلِك حُبي فـ بُكايا

عليكي و صبري كان اكبر

من اني احب يوم غيرك

و قولت سنين اوام تجري و هتعدي

و اشوفك ضي فـ عيوني

و انا ماسِك ..

فـ توب روحي اللي رايحالك

و متعلق فـ دعوة امي يوم ليا

بإني الاقيكي فـ الجنه

بتوب الفرح و حوريّه

فصبراً و اللي صبروا اكيد

فـ يوم نالوا امانيهم

برغم الشوك فـ اشواقهم

و جرح البُعد و فراقهم

املهُم كان دوا ليهم

شعور ع المعاش

بِتِرسِم بِدمع التَمَني سبيل
لِخطوة عيوني في ليل الوداع
و تكدِب لان الحقيقه أكيد
بتقفِل بيبانها في وش الخداع
...
لَماضِة عيونها بتنزِف نُكَت
على الضحكه لما ..
تِقلِب بِموت !
و قبل اما تبدأ ايديها بسلام
بِتكسَر حنينها بِلحظِة جمود
...
و تِرسم ملامحي
على شط زيفها بِكل إنتعاش
يموت اللي باقي
و يفضَل ما بينا شعور ع المعاش

اوقات

اوقات نوجعها و توجعنا
دنيتنا كإنها حلم ضرير
اول ما بيبدأ في منامنا
بنشوف الشوك و كإنه حرير
فبنحضن فيه و بنضحك ااااه
ع الامل اللي احنا بنتمناه
يمكن من بعده نلاقي حياه
جواها  نعيش حبنا بضمير
اوقات بنسافر و بنرجع
في عيون الناس و كإننا طيف
على خد فراشه و الوانها
بتعافر في سواد التخاريف
صاحيين لكن عايشين اموات
و كلامنا كتاب دايب في سكات
دايرين بندوَّر ع النهايات
قبل ما نبتدي و طموحنا ضعيف
اوقات في الظاهر روح  واحده
و يبان فـ عينينا الحب اكيد
لكن جوانا الروح شارده
بين ذكرى و ماضي وحلم بعيد
شاهدين و ماشوفناش يوم حاجه
عايشين و قلوبنا فـ تلاجه
و بنشرب حزننا بسذاجه
و ربيع ايامنا خريف بيزيد

اشتياق

من شوق عينيكي اللى اتملِت
بدموع لقانا المستحيل
من 100 دليل اتمكنوا
من شوقي ليكي المنجرف
انا باعترف
رغم انحصار الكلمه بالصمت الرهيب
حبك نزف كل الاسف
رغم التوكل ع الاله
كان النصيب
مشهد مريب بين حضن عاشق مُنكَسِر
و الوحده بتطَفي فـ سجاير عمرها
و كإنه طفاية وجع
نَفَسين حنين من عُقب لساه مانطفاش
يعني الامل سلطان و كيفه مانتهاش
و الضحك مِتركِب غلط
على وش مستسلم ضعيفِ
للصوره و انتي بتسبقي فجر البعاد
قولة مافيش على باب عتابك مختتم
لقصيدة الحلم الشجي
اللي انتي سايباه فـ انهزام
مش معنى انك ترفضي
يعني اللقا بينا حرام
لاء دي البدايه لـ100 طريق
بس انتي لو بتفكري
راح تبدأي صومِك عن العند الغتيت
و الحضن بيت مليان دفا
و النيّه مش كافيه و خلاص
دي الضمه منِك لو بزيف
تقتِل فـي خوف مالهوش اساس
و تهد فـ جبال بُعدنا
و كاسات بيشربها الوجع
من يأسي نيل
دا الوقت خيل و العمر مضمار السباق
فماتسمحيش للموت ياخدنا
و احنا لسه فـ اشتياق

حِلمِنا

حلمنا انا و انتي ..
مش محتاج عيون
ولا حتي نوم 
الحلم ممكن يبقى صوم 
عن اي ضيق 
عن مستحيل بلقانا مات
او كلمه صادقه نحسها
تقتل هموم 
حِلمِنا .. 
انا و انتي شوق بين البعاد 
و ما بين سهاد خطوة شروق
شمسك على سكة حياتي
ياللي انتي ذاتي
فين اروح..؟؟
و انتي البحور المُنجيه
و الشط جنبِك كان غريق
حِلمِنا تصوير بطيء..
للحب فوق خد القلوب
و الفيلم انتاج مشترك
بينِك و بين كلمة بادوب 
من نظرتين ..
ياللي انتي مني
دا حِلمِنا اصدق كتير
من 100 حقيقه و 100 ضمير
اصدق كمان م الصبر..
فوق دقن الولي لما يزيد الابتلاء 
حلمنا ضمة خشوع 
حبة دموع فـ السجده خوفاً او رجاء

بحبِك اوي

الضي ضيِّك و القمر
جنبِك مُخيف
و النسمه نَفَسِك و العبير
لو يوم بِعِد عنِك كفيف
و المستحيل فـ ايديكي سهل و مُمكِنات
و الامنيات تصبح حقيقه مؤكده
و عشان كده بحبك اوي
اه و النبي و العشره دول
 انا حبي ليكي بالاصول
مش لعبه فيها بنات ورق
دا اللي اتسرق قلبي بصحيح
يا مكتفه الحزن بِفَرَح
يا ورود و شوكها قلوب دهب
صوتِك وهب
للقلب من تاني الحياه
كان اتجاه قبلِة شعوري بالغلط
و الحب قبلك 
كان صلا من غير وضوء
حبِك شروق مالهوش غروب
فـ إزاي يضيع حُبِك فـ يوم
و إنتي الطهاره لقلب كان عايش على
فعل الذنوب

أحلام

احلام و احلام
تفسيرها كلام بين قلب و قلب
لكن هيهات
دا الحضن ساعات
بيفرق بين اتنين فـ الحب
و الكلمه جروح
لو مره تبوح
بشعور ممنوع
لكن مسموح
يتقال بالصمت
داير ما يدور حوالينا بحور
افلام بالاسود و الاسود
و الحزن بيألِم و يهدد
فـ ساعات الفرح الممنوحه
علشان نشتاق
و القرب فراق فـ عيون الوقت
و الحلم يادوب " انا ليك اشتقت "
اكتر من عِندِك لدموعي
اكتر من كرهِك لشعوري
ساعِة ما قِدِرت
 اخطف من روحِك اغنيّه
تتقال بالصوت المتبعتر
على ارض سكاتِك فيغني
و بأجمل لحن
دي الوحده جنين مفطوم ع الدفن
و انا بيكي ادان
على مدنى امان و فـ حضنِك بوحت
بالسر الكامن فـ ضلوعي
و ياريتني ما قولت
علشان احلام
تفسيرها كلام بين قلب و وهم
و ياريت ما حلمت

فيلم مجاز

و بتقتلي الإحساس
على باب عيونك ليه
و كاني فيلم مجاز
مليتي يوم تشوفيه
..................
الثابت ان الاااه
ضي فـ حياتنا و شمس
و الحسبه مغلوطه
من كااام سنه و اكتر
و ساعات تجر ساعات
و اليوم فـ حضن الامس
نفس الدموع هيّ
بس اللجام اخطَر
عماله ترمي الشوك
وسط الضلام بالأمر
و ان موتنا بتحني
و الزيف بينزل دمع
كداب يا خوف قلبِك
لما ابتدينا كلام
و ان كان سُكاتِك جنه
علينا تبقى حرام
عيشتي الحياه بالسُنه
و سيبتي ليه الفرض
وللا الايمان بينَّا
شوكه في حضن الورد
يا مقفله عينِك
و الشوف فـ وش الحق
مركب وصولنا لبكره
نطقت و قالت لاء

شيء مات

كده من بعيد لبعيد
من غير سلام ولا شوق
هزِة دماغ كافيه
و كإنُه طيف محروق
هنعيده ليه تاني
و نصحي جرح قديم
بكفايه مش قادِر
ربك بقلبي عليم
مابقاش في بينا عتاب
مين فينا حب و ساب
قلبه يبيع حبه
لدموع و اه و عذاب
قلبي اللي غيرتيه
انسيه و ودعي فيه
و ان مال لحبك يوم
للنار انا هارميه
و عناد بقى بعناد
وان مرة حضنك فات
واشتاق يزور حضني 
هزرع فـ حضني اهات
قلبي اللي كانلك يوم
لو لام يلوم بسكات
بس النهاردة خلاص
ليه تندهي شيء مات

اتنين شاربين

و مالوش فـ الشُرب لكن جرَّب
فاتعلق بيها و اتعذِب
و فـ اول لقا من بعد ما فااق
بينهم لقى نفسه بيتهرَّب
سالته ليه بس ما كنا اتنين
عايشين و ما بينا اشواق وحنين
ايه خلاك تبعد و تسيبني
اتعذب بين اشواك و انين
قلبه الطيب لقى روحه سعيد
و هيقدر تاني يحب جديد
و يضحي عشان واحده بتهواه
و هتبقى معاه مبسوطه اكيد
فاتت ايام و وراها ايام
و عذاب بيزيد جواه و الام
طال بعدها جدا ولا قادر
ولا حتى يشوفها فـ الاحلام
اتاريها كمان كانت شاربه
قابلته و اتعلق قلبها بيه
فاقت نسيته و يادوب ثانيه
قلبها من تاني حب عليه

مِترو

فاكره لسه ولا ناسيه
يوم لقانا جوه مِترو
كنت شايفك وانتي واقفه
و العيون حواليكي كِتروا
قمت عامل فيها عنتر
شيء فـ قلبي كان مسيطر
روحت واخدك جوه حُضني
دي خطيبتي يابني قصَّر
شُفت جوه عينيكي حيره
و غيره باينه جوه عينهم
و انتي لسه ماسكه ايدي
و فـ وريدي بعيده عنهم
جت محطه قمتي نازله
قلبي سابني و راح معاكي
رغم شوقي كنتي قاسيه
خدتي شمسي فـ ليل هواكي
عدى وقت كبير و قلبي
نفسه بس يشوف عينيكي
كنت باحلم بيكي جنبي
و فـ ايديا شوق ايديكي
و التقينا مره تانيه
و كان لقانا جوه مِترو
صدفه شُفتِك و انتي واقفه
و العيون حواليكي كِتروا
قمت عامل فيها عنتر
شيء فـ قلبي كان مسيطر
روحت واخدك جوه حُضني
دي خطيبتي يابني قصَّر
قمت واخد فوق دماغي
و ابتدا دمي يسيل
اصل جوزِك كان معاكي
و اللي عمله شيء قليل
و السبب خوفِك عليا
او عليه ايه بس يفرِق
يكفى ان الصدفه ديّا
جمعتنا و تاني شُفتِك

مافيش فايده

اللي حَب عليكي خانِك

و اللي حَب عينيكي مات

و ابن حظِك لما سابِك

قُلتي ذكرى و ماضي فات

طب قوليلي عايشه ليه ؟

و انتي ايه فـ الدنيا ديّا

عندِك ايه تاني تقوليه

غير بريئه او ضحيّه

دي القضيه هيّ انِك

عايشه دورِك غصب عنِك

حلم تاااااايه مستحيل

و الدليل هوّ السُكات

عن رجوعِك تاني قادره

تحمي ضهري او مسانده

خطوتي لو مره ضَلِت

سكتِك قبل الممات

اجمل حاجه فيّا ... اغنيه

باحكي ليها كل حاجه فـ يومي فاتِت

مين صاحبته و مين فـ قلبي صورته غابِت

و اما باتعب بلقى اجمل حُضن ليّا

حُضن بين برواز ورق و صورتها هيّ

بس ليه دايماً بلاقي حضني ليها و اشتياقي

صوت بيصرخ فيّا لما ... انسى ان حبيبتي ماتِت

صعب جدا مستحيل اني يوم اتخيلِك

بين عيون الموت و قلبي لسه فيه حبِة حياه

صوت عيينيكي جوه عيني كل ماتعب بيناديني

افرد الاحلام و اشوفِك و انسى جرحي و اي ااااه

ده انتي اجمل حاجه فيّا لما مُتّي هيّ عاشِت

اول لقا .. قبل الزحام .. نفس الغلط

مُفتَتَح

اقسمت بكل المعتقدات
إنِك بالذات
مالكيش فـ التوبه لو كانت
رهبنتِك خوف من بُعدي ساعات
اقسمت بكل خيال و محال
ان الترحال في كلام معسول
و بشيء مقتول جواكي غبا

اول لقا ..

و قبل الشقا
كنتي ملاك الطيبين
تدعي و انا اقولِك امين
حاضر في زارِك مُبتَلي
بالجرح ويا المجروحين

قبل الزحام ..

بوسِة سلام
على خد شفاف مُلتحي
و الدقن دي مش مشيخه
ده كسوف و خوف من شيء خفي
و المغزى من كشف النقاب عنِك قبول
محتاجه جدا 
من قبل ما اتحوِل نبي 

نفس الغلط ..

رغم ان حضنك كان سبيل 
و دليل اكيد للمستقيم
لكن عديم و النيه كات سابقه العمل 
ان البطل خسران
من غير ما يلعب اي جيم
و بترجعي جايبه البكا
فـ كفوف عينيكي و للاسف
بطلت اكون ليكي رسول
او حتى بيكي شيطان رجيم

ورق زينه

بيخاف من نفسه على نفسه
و بيشرب عُمرُه سجاير فَرط
و البنت فـ كوتشينِة حلمُه
شايب و بيلعب بيه النَرد
عايش فـ كتاب حواديت فاشل
فارِس و حُصانُه ورق زينه
تمثال بيمَثِل على روحُه
و طموحه يادوبَك فاترينه
مِتزوَّق بس بِأوهامه
و كلامه فـ ماضي و حاضِر لاء
ماشي و مُش شايف قدامه
قلبُه اللي إتمَرَد يوم ع الدَق

شطِك أنا

لون المحبه فـ قلبي توب مغزول
من ضحكتِك وقت المطر و الليل
و إن مال غناكي ع الألم بيزول
و تدوب قساوِة غربتي و الويل
يا تميمِة الحظ السعيد
يا مُلهمه لِضحك البُكا
يا مُسعفِة كل الجراح
اللي ابتدِت قبل اللُقا
شطِك أنا لما المواني تُرفُضِك
و تِشتِتِك بين شين و زين
قلبي الرَزين دفِة وصولِك للحياه
و المٌلتقى حُضني الأمين
اللي الحنين جواه بيرسِم خطوتِك
على ضي أنفاسُه بِعشم
و يرتِل التِلت الاخير من قربه ليكي
اللي إتملا نور لما هلِت ضحكتِك
يا قسوتِك لو يوم تغيبي
عن حُضن حلم عيون سمايا
يا دموع بُكايا اللي إنتهِت
و إنتي  معايا
لون المحبه و نبضها
سر الثبات اللي إنتي فيه
سر إحتمالي ع البعاد
من غير سؤال او حتى ليه
فماتسمحيش
لـِ الليل يدَوِّب شمس دُنيتنا فـ عذاب
خلي العتاب بينا طريق
مهما يضيق
لكن مسيره يدلنا يوم ع الإياب

بلمسة ايد

و تندهلي ..
البي نداها و اطمِن
بإني هاعيش و لو ثانيه
فـ حُضن عينيها و ادّارى
من الاحزان
و يكفيني اعيش فـ عيونها لو صوره
و كااادر حتى لو بهتان 
بخطوة شوق اسافِرها
تسافرني بلمسة ايد
تعيد ايامي لو تهرب 
من يأس الامل لبعيد
اكيد هيَّ و مين تاني
برمش عيونها تسحرني
و تقتلني بتنهيدها و ضحكتها
فـ وش الدنيا و تغني
بحبها حتى لو ضدي
و رامياني و بتعانِد
عاشقها لما بتسانِد 
طلوع الروح بشقاوتها
و تندهلي ..
تصحي الدم فـ عروقي
و تكتب بالرموش ابيات
يدوب دمع الفراق بينا
فيقلب غنوه و ابتسامات
تقرب فينا لو مهما
بتبعدنا كتير مسافات
و تندهلي ..
احس فـ حضنها بأهلي
و اشوف اللي انكسر فيا
بغربة ذاتي عن نَفسي
بِيترجى اسامِح فيها و اتمنى
و احقق كل ما فـ نِفسي
و تندهلي ..
الاقيني بَكَسَّر كل شيء مكسوف
و من غير خوف
اعيد الصورة م الاول
بكااادِر وشي فيه مألوف

فزورة حبنا

صليت و قريت قران ياما
علشان اكونلك ولا فيش فايده
العيب في ايماني ولا انتي
كنتي بتدعي دعوه محايده
كل ما نتواعد نتفرق
كل ما بنقرب نتباعد
فزورة حبنا بتعاند
و الحل اكيد من بـ ايديا
ولا حتى بايدك يا حبيبتي
الحل ملاك كان في ايديا
قبلك و انا ضيعته بخبتي

ضد و مع

ما يهمكيش ..
لو قالوا صبرِك ع الخلايق قد نَفَد
و ان البُساط الأحمَدي 
مابقاش فـ ضلِك يسوى شيء
و ان الطريق فـ عيون غُناكي 
كله شوك
و ان الشكوك ماليه الحنين 
بالحُزن و الضي الخنيق
سيبك خلاص .. 
انا حضني بحر يساع بلاد
بس العناد .. خلى السكات 
جواكي طيبه مفرطه
و مأكده تصديق دموعهم 
من تجاعيد العيون
و ده مش جنون ولا ياس فيكي
و انا اعتقد انك عشانهم مرغمه
تدي الحلق للي مايمكلش الودان
يمكن حنان ..
يمكن زهق منك ساعات
او امنيات بس المباراه انتهت
صوتي البريء رافض يموت 
من حلم عاشوا بيحلموه
و يمثلوه في مسلسلين 
او ثورتين  "ضد و مع "
ناس إمّعه على كل لون 
متلونين مع كل سيد
بس المؤكَد إنهم
لابسين ظنون عقل العبيد

واحد هزيان

كدب و تزييف و غباء مقصود
محتاج لشهود بعض الاحيان
و لكل جبان دوره المعهود
لما الفهلوه تقلب بجنان
و ساعات غليان او غيظ منك
يِقسِم شِعرَك لحرام و حلال
عشق و معشقه و طريق مسدود
قلبين ساكنين الحزن بيوت
و الموت في عيون الغدر حنان
كوشه و فستان و فرح فالصو
و اتنين نسيوا .. 
ان المأذون هو السجان
و ادي صاحبي و صورنا السيلفي
و البنت اللي عشانها جرحني
و فـ ثانيه لقيت الصاحب خان
نقص و حرمان و الكيف توهان
و ساعات فرافيش
بيخلي "مافيش" عاشق ولهان
و بيبان متسكره على ناسها
و اساسها كلام دايب فـ سكوت
و بحبك موت .. 
و دي اكبر كدبه فـ حواديتنا
بكره انا و انتَ .. نهدا و ننسى
ازاي الموت برصاص فـ ميدان
إمضاء ..
-
-
واحد هزيان
بيفضفض من غُلبُه شويّه