بلاش تكدبي

كلميني عن حبك القديم

 و بلاش تكدبي

كنتي فعلا بتحبيه

و اما يغيب عنك تناديه

تشتاقي للمسة ايدية

تتمني منه تقربي

ولا كان مجرد لعبة بتلعبيها

و انتى في الاخر ملتيها

و قولتي تشوفي لعبة غيرها

عشان خلاص جيبتي اخرها

و ابتديتي منها تزهقي

كلميني و بلاش تكدبي

قوليلي ايه معنى سكاتك

هو كلامي ع الجرح جالك

ولا ما كانش يخطر على بالك

بصعوبة قلبي منه تتمكني

كلميني و بلاش تكدبي

انا فعلا جواكي ساكن

ولا قلبك مافيهوش اماكن

و حبك ليا كان حب شارد

حب ميت احساسه بارد

و ذكرى لحب قديم

مع قلبك متعاهد

و في قلبي عليه بتدوري

كلميني و بلاش تكدبي

اه بجد

اه بجد

حاولنا نوصل باحلامنا

لأبعد حد

حلمنا نزرع ف كل فلب

حنيّة  طيبة شوق وحب

حلمنا لكن

مالناش اماكن

ف دنيا غريبة عجيبة

توهنا فيها عن بعض

اه بجد

حاولنا نوصل باحلامنا

لأبعد حد

حلمنا بشيء يدفينا ينسينا

مرار الالم

صحينا لاقينا عينينا

مليانه دموع اهات و ندم

قولنا ياريتنا

ما كنا حلمنا

لما لاقينا احلامنا

قصاد عينينا بتتهد

اه بجد

حاولنا نوصل باحلامنا

لأبعد حد

ليه باقيتي يا دنيا بحر غريق

و انتى اللى كنتي لينا

حبيبة و صديق

ايه غيرك

مين علمك

تزرعي فينا الشوك

مكان الورد

اه بجد

حاولنا نوصل باحلامنا

لابعد حد

اخر اشعاري

كتبت الشعر لكي انتي

احبك اول كلماتي

لمحت الغدر بعينيكي

فروى الدمع اوراقي

جف المداد فلن يكتب

مات الكلم على لساني

حطمت كل الاقلام

مزقت اخر اشعاري

كنت اعيش في حلم

و كان الحزن ينساني

طعن القلب فلم ينزف دما

و نزف القلب احزاني

فلن اكتب شعر يمدحك

و سيكون الفراق اخر اشعاري

هو ايه معنى الحب؟؟

هو ايه معنى الحب ؟

يعني لهفة و شوق و بس

ولا قلب بيه تحس

يشغل بالك ليل نهار

ولا انسان يسكن كيانك

يسقيك و يشرب من حنانك

و يضحي باي شيء عشانك

لو حتى بعده يعيش في نار

هو ايه معنى الحب ؟

يعني حياة من بعد موت

ولا احزان جواك تفوت

و يسكن مكانها فرح

ولا بحر من حنين

تروي بيه عطش السنين

و يداوي نفسك من الانين

لو كان في قلبك الف جرح

هو ايه معنى الحب ؟

سؤال نفسي اعرف اجابته

الحب .. الكلام اللى انا قولته ؟

ولا باقي كلام كتيير

ولا يمكن الحب اكبر

و عنه الكلام ما يقدر يعبر

و انا مهما قولت مش راح اقدر

اوصل لاجابة او تفسير

هو ايه معنى الحب ؟

بتقولي انك

بتقولي انك

بتجري ف دمي ؟

طب انا راح اغيره

و لو حبك

لسه ساكن قلبي

بايدي هكسره

مش هسيبلك ذكرى ليكي

حتى ان كانت نظرة لعينيكي

و ان حلمت مرة بيكي

الحلم مش هكمله

همحي صورتك بالمحال

م الحقيقة و الخيال

وليكي لو احساسي مال

عن كياني هبعده

هنسى اسمك .. هنسى شكلك

هنسى دمعك ... هنسى ضحكك

و لو هموت انا في بعدك

هبعدك .....
و اجري ع الموت و احضنه

انتى فاكرة اني لعبة

انا حكاية عليكي صعبة

و ما اتخلقش ف الدنيا واحدة

تجرح قلبي و تعذبه

بتقولي انك

بتجري ف دمي ؟

طب انا راح اغيره

يا من ملكتي الروح

حبيبتي ......
يا من ملكتي الروحَ و الوجدان
أحبكِ حباً صادقاً
لا يعرفُ كذباً أو بهتان
أناجيكِ وأناديكِ ... فاسمعي
نداءَ قلبي الولهان
أحبُك ......
فهيا اقتربي ... اغترفي العشقَ
بنهم ٍبلا ألم ٍ بلا أحزان
أودعي قلبكِ بينَ يدي
اسكني مقلتي
فأنا هيأتُ نفسي
لتكونَ لكِ الأوطان
حبيبتي ......
يا من ملكتي الروحَ و الوجدان
أعيديني بسحرِ عينيكِ
بهمس ِ شفتيكِ
من اللا وجودِ والشرودِ
إلى عالمكِ النابض ِ بالحنان
أوقدي بداخلي لهيبَ العشقَ
و اعزفي بقبلاتكِ فوق شفتيَ
أجملَ الألحان
أنا استبدلتُ الآلامَ بالغرام ِ
و أصبحتُ بحبكِ أعظمَ ملكٍ
اعتلى عرشَ العشقَ 
على مرِ الأزمان

حبيبتي يا مصر

 

من زمان و انا مش شايف
غيرك انتي يا حبيبتي
حتى في مرايتي شايف
صورتك هي صورتي
و اما بحلم ... بحلم بيكي
بحلم و انا حاضن عينيكي
و افوق من الحلم الاقي
ابتسامتك فوق شفايفي
من زمان و انا مش شايف
غيرك انتي يا حبيبتي
-
-
حبيبتي يا مصر

هعيش وياك في احلامي

رميت شوقي في حضن الشوك
ضحيت عشان تنساني
حبيبي خلاص من وهمي هفوق
لقيتك مش علشاني
وهمت نفسي ... كان في نفسي
اكون لك حاجة
اتاريني بحلم ... و رافض افهم
مش من حقي
اكون لك حاجة
انا هبعد و هستناك
تجيني اشوفك في منامي
مادام مش من حقي اعيش وياك
هعيش وياك في احلامي

لملم خيوط الاسى

لملم خيوط الاسى وياك

خلاص جوايا الحزين هيبتدي يفرح

و اكتب سطورك الاخيرة

على جبين اللقا

و ودع كل ركن عشت فيه و مطرح

دور على وطن يشبهك تمام

وطن نهاره زي عتمة الليالي

و ليله سابح ف نهر آلام

يروي زهر الاهه فيك و يطرح

لملم حجاتك ... ذكرياتك

لملم فتات شيء انكسر

كان ف ليل التوهه ليك دليل

انا خلاص .....

بنيت بيني و بينك سد عالى

سميته المستحيل

بنيته بدموع و دم قلوب

كان مكتوب عليها تعشق

و انت فيها تجرح

لملم خيوط الاسى وياك

خلاص جوايا الحزين هيبتدي يفرح

لو بعدت عنك

لو بعدت عنك هلاقي

الف  قلب فاتحلى بابه

الف  قلب يتمنوا حبي

يسكنهم ... يسقيهم من حنانه

لو بعدت عنك هكون و مش هضيع

مش هتتكسر قلوعي

مش هتتالم دموعي

مش هسلم لجرح قلب

سهل انه ف لحظة يبيع

لو بعدت بس قولي

قلب مين هيحس بيك

مين يهون عليه قلبة

و يرميه بين ايديك

مين يتحمل قلب خاين

كل دقة من دقاته بتقول وداع

ملاك من بره باين

و من جواه وطن للتوهه و الضياع

اوعى تفكر عشان بحبك لسه وياك

دة مجرد عطف مني

انا لو عليا سهل جدا انساك

بس اعمل ايه في حنية قلبي

لما قولتلى بحبك

لما قولتلي بحبك

لاقيتني طاير ف السما

من غير جناح

و بايديا بحضن الاماني

نسيت اهاتي و احزاني

ماتت جوه مني الجراح

حسيت ان ليا كيان

و بين البشر موجود

و ان قبلك عشت سنين حرمان

تايه غريب مفقود

و اما لمست حبك بقلبي

ابتديت اعرف طريقي

لاقيت الدموع ... ف عينيا بتبكي

ع العمر اللى راح

قبلك يا حبيبي

لما قولتلي بحبك

ليه ؟

ليه بنهرب م السعادة
هو يعني الفرح ذنب
و ليه بنكره الحقيقة
و كلامنا ليه بقى كله كدب
ازاي وصلنا لكل دة
حياتنا بقت متلخبطة
نحب اللى يجرح فينا
و نكره اللى فينا يحب
ليه ليه ؟
ليه بنكتب النهاية
قبل ما نعيش الحكاية
و نقول خلاص مافيش نصيب
ليه بننطق بلسان القدر
ليه بننسى اننا بشر
والله دة شيء امره عجيب
ليه ليه ؟

نفسي اسمعها منك ( عمل مشترك بيني و بين الشاعر الجميل محمود هميسة )

قالتله نفسي اسمعها منك
رد ... أمرك
بس هقولها بشكل تاني
حبي ليكي جوه قلبي
مش كلام ولا أغاني
هكون صديقك هكون اخوكي
هبقا اقرب حد ليكي
ومش هسيبك لو ثواني
لسه عايزة تسمعيها ؟
إيه تساوى كلمة قصاد حناني
انتى قولتى حاسه بيا
طب ليه عايزه تسمعيها
قربي بصي ف عينيا
هتشوفيها ...
مكتوبة بالدموع
دموع حنيني اليكي
دموع فرحتي بلمسة ايديكي
دموع خوفي لو مره بعدت عنك
و ما انكتبش ليا رجوع
قربي من قلبي اسمعي دقاته
كلمة بحبك هى سر حياته
لو يوم بطل يقولها
يموت و يدبل بين الضلوع

لسه عايزة تسمعيها ؟؟

العشق جرح

كل عاشق في قلبه جرح

دايما باين ف عينيه

جرح اقوى من الف فرح

صعب انه يداويه

جرح سببه قلب حبه

و فجأة خان و هان عليه

و جرح اتولد جوه منه

لما شاف حب عمره

لحد تاني و مش ليه

و جرح ساكن قلب حبيبة

و اما حب يداويه بايده

هرب الجرح و سكن فيه

اصل العشق مش حب بس

و قلوب تتلاقا وببعضها تحس

العشق ممكن يبقى جرح

ساكن جوه منا

برضانا او غصب عنا

بنفتح قلوبنا ليه

صندوق قديم

طفلة شقية

شافت لعبة

شبطت فيها

فرحت جدا

لما لاقيتها و امتلكتها

بقت في ايديها

بس بسرعة

 زهقت منها

اوام كسرتها

و طلبت تاني

لعبة جديدة

اصلها طفلة

شقية عنيدة

طفلة غريبة ما بتهداش

عايشة حياتها

كدة و خلاص

عايشة حياتها بالمقلوب

عايشة عشان

تكسر في قلوب

و قلبي كان

من ضمن لعبها

المكسورة

في صندوق قديم

صعب جدا

تفتكر اقدر انسى

كلمة منك او حتى همسة

صعب جدا مستحيل

انسى ايه ؟

انسى نفسي .... انسى قلبي

انسى حلم اتمنيتة عمري

ول حب مالوش بديل

صعب جدا مستحيل

صعب جدا و اللى اصعب

اعيش حياتي من غير عينيك

اعيش بعيد مقدرش اقرب

منك او المس ايديك

صعب لكن ايه بايديا

الفراق مكتوب عليا

فراق من غير رجوع

حتى لو ف الحزن عشت العمر كله

او بكيت بحور دموع

نفسي ... يموت جوايا صوتي

و اعيش بعيد ويا سكوتي

خلاص هقول حبيبي لمين

بعدك عني ... اخد مني ... حلم عمري

و الشوق و الحنين

كل دة و بسالك !!! اقدر انسى

ازاي و انت ساكن جوايا لسه

يا ملاكي الجميل

صعب جدا مستحيل

اكبر كدبه ف حياتنا

وردتين في بستان

كنا عايشين حياتنا

جف نهر الحب .... مات

كل شيء جميل بيننا

و ابتدينا ندبل

و يبان منا الشوك

مات حبنا قبل ما يكمل

و مات معاه الشوق

دارينا جروحنا .... جوه روحنا

و لا بوحنا بالاه

كإننا راضين .... ولا حاسين

ببحر الالم  اللى غرقنا جواه

و افترقنا من غير وداع

اخترت طريقي .... و اختار طريقه

ايه يعنى حب و ضاع

بكرة يقابل كل واحد منا حبيبه

بس تعرف .... مش هنعرف

تاني نحب .....

و ما نستاهلش انا و انت الحب

ياريت نسيبه لغيرنا

لقلوب اطهر من قلوبنا

قلوب تعرف معنى الحب

وردتين في بستان كنا عايشين

اكبر كدبة ف حياتنا

سوق القلوب

ياللي من غير قلب

تعالى اتفرج و اشترى قلب

هنا سوق القلوب

..........................

قلب خداع

قلب بياع

و قلب من همسة

يعشق و يدوب

قلب مليان غيرة

قلب مشاكلة كتيرة

و قلب صافي ف حبه وافي

للمحبوب

هنا سوق القلوب

...............................

قلب يعشق كل يوم

قلب حزين مهموم

قلب ناسي

قلب قاسي

و قلب ف صبره ايوب

هنا سوق القلوب

.......................................

قلب يجرح قلب حبه

و قلب مجروح م اللى حبه

قلب زى الشمس يشرق

و قلب يعشق الغروب

هنا سوق القلوب

..............................

اشتريلك قلب

يعيش معاك طول الزمن

قلب يكره او يحب

انت اللى هتدفع التمن

و كل شيء محسوب

هنا سوق القلوب

صفر على عشرة

عارفه ليه في حبي

اخدتي صفر على عشرة

عشان إسيتي

هجرتي ما حنيتي

هانت عليكي العشرة

ذاكرتي حب تاني

و اهملتي مادة حبي

كتبتي ف الورق انساني

بدل خليك جنبي

( اسفة )

ما تندميش ع النتيجة

دا انا كارمك فيها خالص

الصفر كتيير عليكي

دي نتيجتك كانت بالناقص

و انا لو منك اعمل حفلة

انا بعترف اني غلطت

حبيت واحدة بليدة

لكن خلاص من دلوقت

راح احب واحدة جديدة

تكون في حبي شاطرة

عرفتي ليه في حبي

اخدتي صفر على عشرة ؟

معايا ف حلمي

ليه معايا ف حلمي دايما

و اما بصحى مش بلاقيك

نفسي افتح عيني مرة

القى عينيا ف حضن عينيك

نفسي اضمك و انا مش خايف

ان ف لحظة ممكن اسيبك

نفسي اقولك ع اللى ف قلبي

و ف حقيقتي ابقى حبيبك

و تكون ليا و اكون ليك

ااه تعبت م الحقيقة

و انت فيها مش معايا

و اتمنيت لو باقي عمري

اعيشة ف حلم مالوش نهاية

و لو ف يوم الحلم انتهى

يبقى حبيبي العمر انتهى

و ده مش بايديا ولا بايديك

ليه معايا ف حلمي دايما

و اما بصحى مش بلاقيك