الصورة مقلوبة

الصورة مقلوبه

الوانها مسلوبه

بروازها متكسر

و الناس بتتفرج

عليها و تهرج

و لا حد يوم فكر

ليه شكلها مقلوب

ليه حلمها مكتوب

عليه ما يتفسر

الكل ف اختلاف

في منهم اللي شاف

حقيقة المنظر

و منهم اللي راح

يصب م الجراح

عليها و يكتّر

و منهم اللي ناوي

يحرقها و غاوي

ف عمرها يقصر

الصورة دي بلدي

و حلمها الوردي

ف ايد تعمّر

ايد تساعدها

تعدي محنتها

ف زمنا الاغبر

تخاريف

ف الليل

بعد الحياة ما تنام

و الصمت يملا دنيتي

و ف وحدتي

اصب م الذكريات

كاسات ..

اشربها ..
 أنسطل ..

و تبدأ التخاريف

بضحكة حزينة

فوق شفايفي

ترسم ملامحي من جديد

ترسم على وشي العنيد

شكل مخيف
يزعج مرايتي المُعتمة
و المؤمنة
بوشي القديم

و القاني 
ف سكة واخداني

لمكان اول لقا

بيني و بين نفسي البريئة

قصدي ...
اللى كانت بريئة

و اتبدلت ف زمن الزيف

نفسي اوصل

لكن طريقي

مش بيكمل ..
و تتوه الخطوة مني
حلمي الجميل
غصب عني
ينكسر فتافيت
تنفرط عناقيد
الشوك جوايا
تمزعني ..
تصدمني ..

و افوق م الصدمة 

الاقي ....

نفسي فوق رصيف
بتسول البسمة
من عيون الفرحانين
و ابيع الدمعة
للي غاوي يموت حزين
و انااااااام 
حاضن وحدتي
و دمعتي ملو الكفوف
احلم ..
و ف الحلم اشوف
ذكريات ...
ماليا الكاسات
اشربها ..
 انسطل ..
و تبدأ التخاريف 

قرار

مييييت طريق

محتاجين منك قرار

يقوي خطوتك يعاند

خوف يأدي لانكسار

خوف يسافر بيك و يشرد

عن طريق الحق يحود

يملا نفسك بأنهيار

مييييت طريق

و انت واقف

مهزوم و خايف

من عواقب لاختيار

خد لك قرار

و اهزم العقل اللى عشش

فيه غباء المستحيل

اهدم الحيرة و دشدش

يأس خلى .... املك عليل

خطي و ابدأ رحلتك

اختار طريق لسكتك

يوصلك ... للانتصار

ع الحياه المعضلة

بتجربه ......

او قرااااار