سطور الذكريات

السلام كان بالتمني

مش بإيد فـ حضن إيد

نبض شوقها جوه قلبه

غنوه عايشه فـ الوريد

و اما دمعه سال كلام

فوق سطور الذكريات

ابتدا بينهم ملام

بالعيون ويا السكات

شافِت الدبله فـ ايديه

هو شاف دبله فـ ايديها

ابتسم بدموع عينيه

هي دارِت اللي بيها

اهمال

 كداب مين اللي فـ يوم قال

ان الإهمال بيخلي الحب

نار زايده و قايده ما بين قلبين

و ان فراقهم شيء جدا صعب

لو كان الحب مالوش اخر

كنت بإهمالَك خليتني

انده فـ عينيك الشوق يرجع

تلمس بايديك قلبي فيخشع و يصالح فيك

بس الحسابات المبنيه على ردة فعل

تهدم فـ جبال واقفه قويه و الحب يقل

سيرك كبير

عايش كذا ضِد

ما بين الناس و اوجاعهم

ما بين فتافيت ضمايرهم

بانيلَك سَد

ملاك ع الارض
لو ادام بنت

و ما بين اصحابك تقلب قرد

و ساعات فـ الحلم بطل مِغوار

بيعدي النار ولا يتبَلِش

دايما تِألِش

لو عدى الجرح قتل فرحك

و كإنَك شوك فـ ايدين الورد

بتشوف الكون بعيون مجنون

و ساعات عاقل جدا و رزين

زي الشاطر فـ كتاب حواديت

حبس الكتاكيت جوه الزنازين

شايف صورتك جوه الكوابيس

ذكرى فـ كراريس

مع حب قديم حبيته زمان

و صبح للغير

حبة نسيان غطوك فَحلِمت

انك بلياتشو فـ سيرك كبير

هزيم إحتمالِك

يعدي إرتِباكِك

على الحلم يبقى

غريب فـ إبتِعاد

و يخلق ثَباتِك

فـ قلبي المعافره

لِحين إستِعاد

هزيم إحتمالِك

و خوفِك يموت

و يبدأ غُناكي

على الحلم يندّه

بـ 100 الف صوت

و افُض إعتِصامِك

بغاز حبي ليكي

و طلقِة وِداد

و رغم إعتراض

جنابِك ساعات

بلاقي فـ عيونِك

و سَمتِك حياه

و آآآآه لو تِضيعي

فـ وسط الجواري

راح انده عليكي

و اكونلِك سلامه

و اقولِك جِهاااااااد

لِحد اما احقق

 نِبوءِة تاريخِك

بإنِك هتبقى

منار للعباد

و اقابلِك بِضحكه

و امسِك بايدِك

نِعدي الصِراط

و اطالِب بِعرشِك

لأني بحبِك

و مُت فـ هواكي

بـِ لإستشهاد

لقيتِك حبيبتي

و شايف عيونِك بتضحك و تبكي

بضحكه بريئه و دمعِة مطر

و كلمة باقولها بهمس الشفايف

تطبطب عليكي فـ وقت السَحَر

يا نسمه و جايه تهفهف عليا

و تكسر شجوني بغنوه و سمر

لقيت السعاده في لمسِة ايديكي

و نظرة عينيكي تخلي الحجر

يلين بابتسامه و يفرِد شراعه

مِودَّع قساوته كإنه إنتصر

و شايف جمالِك بيرسم طريقى

في قلب الشوارع بنجمه و قمر

و يحلم معايا بدنيا تسامح

جمود الملامح و شوق انكسر

دنا كنت قبلِك باقول مستحيل

يكونلَك يا قلبي نصيب او قدر

تحب و تعشق بدون اختناق

و دمعه حزينة في ليل السهر

لقيتِك حبيبتي نسيت اللى كان

نسيت حتى اسمي و كل البشر

( ... ثم إني .. )

ثم اني مش بحبِك
ثم قربِك زي بُعدِك
ثم ليلِك عتمه خالص
اصله خالِص م اللي فيه
يعني كدبِك زي صدقِك
و الغرام بتزيفيه
ماتقوليش كان بينا شيء
ثم انا اصلا بريء
من غرامك و ابتسامِك
اللى عمرى ما كنت ليه
ثم ليه دمعِة عينيكي
فوقتي ولا حلمي بيكي
ابتديتي تحققيه
اهدي بس و اسمعيني
اصل لازم تفهميني
الرجوع ده قصه فاشله
و المناقشه وقت ضايع
انتى قاصده تضيعيه
ثم انا بارمي السلام
بالادب و لإحترام
ردي خلى الجرح يهدا
و اللى بينا ودعيه
مش هلومِك لا خلاص
او اطالب بالقصاص
روحي رب الكون يسامحِك
قلبي سايبِك منه ليه

كلمه

اهي كلمه تفوت ولا حد يموت

و فـ حُبِك انا لسه بعافِر

ازاى بِسكوت راح اكونلك قوت

تتقوي عليه من جوع كافِر

يا مراكب في بحور اشواقي

يا سواقي القلب العطشان

حُبِك فـ حقيقتي و احلامي

خلاني فـ حُضنِك انسان

و اهي كلمه فـ وسط الاغنيّه

احلمي بيا تلاقيني عيون

برموشها تطبطب على جرحِك

لو كان فرحِك تايه مسجون

يا مراسي الدنيا و مافيها

يا غناوي الناي قبل ما يحزَن

يا شموس السما طول لياليها

صوت حُبِك فـ القلب بِيدَّن

الناس

دوَّر في قلوب الناس حَبّه

على اي بشاير لِمَحبّه

راح تلقى الحب بيدّارىَ

ورا اي خِلاف

و الناس اصناف وقت الازمات

كلمه توديهم و تجيبهم

كِدبه تِخليهُم تفاهات

لَمّه تقويهم تِفتِنهُم

رقصه تنسيهُم اموات

ثورة تِجَمّعهُم إيد واحده

كُرسي يفرَّقهُم جماعات