إشتغاله

لم يكن إعجابها بيا
إلّا حبة فرفشه
بين صحابها فـ سهره حلوه
و نكتتين على دردشه
يعني اراجوزها المِهاوِد
إللي فارِد رغم حُزنه
ضِحكه تِسعِد قلبها
و لم يكن إعجابي بيها
إلّا إني أكسَب رَهان
اصل أنا مِراهِن عليها
صاحبي و ولاد الجيران
يعني عايشينها إشتغاله
 حُب عاشِق للنداله
و لولا خوفنا م الخساره
كنا سيبنا بعضنا

100 قفا

رامية الزهر بحداقه

مش بذائه

بس خاليه م المروّه

و لاعتماد ع الحظ دايما

عمره ما بيصنع فتوّه

و الدليل جوه فـ حياتنا

عم شيخ مَنصَر حارتنا

اللي ناهب و اللى ساحب

فينا زي قطيع بقر

عمره ما فكر فـ لحظه

اننا حبة بشر

فرعون و داق الفرعنه

و عمل لنفسه اله حجر

ضعف النظر هو السبب

ضعف النظر مش فـ العيون

فـ قلوب ما يعجبها العجب

دلوقت مين راح يهزمه 

و يهد معبد حضرته

لا رامية الزهر بحداقه

ولا حظ يقدر يغلبه

تَبَّت ايادي النحاتين

و النخاسين اللي اعتلوا

 كل القمم

حبة رِمَم واكلين عقول المختومين

بحاضر نعم

كل النِعم زالِت مع زعقة نفاق

و بحور رياء و اله بيلهينا بِنِقَم

نرجع نقول

مش كل قول يقدر يغيّر راميتَك

ولا حظ يمنع ليك غبا

نازِل عشم فـ محبِتَك

بطل تشاور ع العيوب 

و تقول يادوب حظي كده

دي المشكله

انك عايشها بـ 100 قفا

و الضرب فيهم ع المزاج

بلا انزعاج .. او كفى

الدنيا زِواق

ما يحس باوجاع الناس
غير قلب تمام اوي مش سَكه
و إن عِطلِت عربيِّة حلمَك
من حِلمُه يزُق معاك زَقه
و اهي مش فارقه
اصله إتعلِم إنها ارزاق
و الدنيا زِواق و كلام فارِغ
مالهوش لازمه
..........................
و ادي ضِحكه
بلون ورد عيونَك
ملعون الحُزن على ابوه
إفرِد في شفايفَك و إتبَسِم
الضِحكه هترسِم ليك تابلوه
كل اللي يشوفه عينيه تُشرُق
زي الشمس اما بتتزوّق
لِنهار فـ السما طالِع يسرَق
ضِحكَه و مِسكوه ... ههههههه

مبسوط يا بيه ؟
طب ايدك بقى على رُبع جنيه
حقي فـ تلميع الضِحكه
قصدي ...
حقي فـ تلميع الجزمه

ضحكه بايشه

رغم إنِك لو مكاني

كُنتي بعتيني هوا

مُش هتبقي لِحد تاني

إلا لَما أموت أنا

آه تِعبت و باعترفلِك

كام سنه و أنا مُش عارِفلِك

إنتي مخلوقه عشاني ؟

ولا لعنه م السما

لما اقربلِك تِغيبي

و اما اشِدِك ليه تسيبي

جرح غاير جوه قلبي

صعب يشفيه الدوا

مُش فاضلِك غير رموش

شوفي نفسِك فـ الوشوش

هتلاقيهم ضحكه بايشه

و إنتي عايشه فيا أنا

مشهد رومانسي

كل مَره تودعيني
و توعِديني إنِك هتقسي
كل شيء كان بينا لازِم

يبقى ذكرى و ماضي مَنسي

بس دايما و إنتي ماشيه
صُدفه او عمداً بتنسي
لقطه من مشهد رومانسي

و إستحاله يبتدي
تتر النهايه و إحنا لسه ماعِشناهاش

ترجعي .. تِكسَري لحظِة وداعنا
بابتسامه من زمان ما شُفتهاش

أحضُنِك .. و ابتدي المشهد و أطوِّل

و كل مَرَه أغلَط عشان ..
 اعيد اللقطه م الأول

لكن بأفوق ...
 و كإني عايش جوه حِلم

أصل إللي كان بينا يادوب ..

 مشهد في فيلم

أنا مليت

بحبها لو بعيد عني

و راميه الحب و غرامها

و نفسي فـ يوم تكلمني

و لو حتى في أحلامها

انا مليت من الغربه

و م الفرقه اللي قاتلاني

و مش فارقه تبيع قلبي

ما دام قلبي راجع تاني

يا ضعف الحيله يا سفينه

مسافره مِفرّقه فينا

مِعانده ليه خطاوينا

ساعة ما نحب نتلاقى

ساعة ما بنلضم الاشواق

بضحكه و لمسه بخيالنا

بحبها مهما كان بينا

جبال مانعاني و مواني

راسمها فـ بالي و خيالي

ساكنها و هيّ ساكناني

اضيع لو تبكي بعيونها

و جوا عيونها عنواني

بحبها إسم و مُسمى

كإنها حته م الجنه

و ليه ازعل أنا مِنها

ما دام مِنها مافيش تاني

تاكسي للجنه

يقوم الصُبح من بَدري

يفَطَر نفسه بالبسمه

و ينزِل من ترام حُزنُه

و يركَب تاكسي للجنه

عايش آيه ما بين الناس

مالوش فـ الكاس

ولا فـ مره يكون غايته

يصحي الكِدب فـ مِرايته

ولا عُمرُه ....

غيَّر خِلقِته بإيده

بِحبِة بويّه و إتمَكيِّج

عشان يكسَب رضا غيره

فـ ساعة العوزه يتمدِد

مراكِب خير

و كل إللي يلاقيه فـ جيبه

يكون للغير

راشِق حلمه .. 

فـ قلب طيور و طالقها

تِعاكِس فـ النجوم يمكن

تِوقَّع نجمه يهديها ... لِعيونها

حبيبته إللي مالوش غيرها

و من غيرها يعيش حايِر

و علشانها .. يموت ثايِر

في قلب ميدان

و لو أمكَن يعيد الكَرَّه 100 مَرَه

عشان يِلمَح رضا نورها

على جبينها ...

بيتنفس بحريه

في آخِر مَرَه كان واقِف

ماهوش خايف

يِأدِن بالجرس فـ الدير

و يتوضى عشان يلحق صلاة الحد

و من يومها حلفني ماقولش لِحد

لا انا فاكر صحيح اسمه

ولا عارف ده ايه معناه

كل إللي أنا شُفته في بطاقته

مسلم مسيحي و كان معاه

فانوس سحري !!

آآآآآه يا غُلبي

ده بايني ..

طِلِع جِني .. !!!

قبل البدايه بخطوتين

ليه الطريق بينا إنتهى
قبل البدايه بخطوتين ؟
و لمين راح اشكي المستحيل
كل العيون مِتجمدين
متسمرين و كإنِهم
تمثال صَنَم ..
بَطَل عبيده تِقدِسه
عشق البلاهه المُنتشي
جوه البَدن بينكسُه
زي الشجر ..
فوق أرض بارِت من سنين
كل اما نتقدِم دِراع
نِرجع بلد
يا شيخ مَدَد
كل إلنذور إتجمعِت
علشان تِحِل المُشكله
ليه الطريق بينا إنتهى
قبل البدايه بخطوتين ؟
و لا إنتَ زيّك زيَنا
بين البينين
مِحتار تِشاوِر ع الوجع
ولا تِسلِم ليه و تُسجُد سجدتين
مِتكتِفه ايدَك ورا
ضهر البلاده المؤسفه
و إزاي بِتُطلُب نستقيم !
و إنتَ صلاتَك فاسِده

عيونِك

عيونِك ليه دايماً فالصو

مِتزوقه بس بنظرات

بِتدوّر ع السيما الترسو

و مناظر من غير عبارات

عيونِك ليه بتتوضى

بنجوم الليل المكسوره 

و مجبوره

تِودع شمسها الفضي 

فـ اخر الصوره ....

بدموع و اهات

يا عاشقه الزيف 

و حد السيف اللي مقطع

حقيقة نفسِك الحلوه

مالوش لازمه 

تسافري على بساط وهمك

تعافري فـ شيء يزيد كدبك

فخليكي فـ حضن النور

يغرد طيرِك إلباكي 

و فجاه يثور

يبدل زعقتِك غنوه

عيونِك ليه بتتحايل

على الضحكه اللي غرقانه

فـ رعب و خوف

و بالعنوه

قوليلي ليه كده بايعه

قصايد حلمك الوردي

و تايهه فـ وسط احزانِك

عيونك فتحي فيهم

و خليهم كما الايه

يصدقها الكفيف بالقلب

لو تِرمِش

و تؤمر كل عشاقها

يبدلوا ليلها بنهارها

عيونِك ثبتي يقينها

و واجهي شيطانِك الساكن

مابين الرمش و جفونِك

و عافري فـ لونِك الداكِن

يموت الحزن و يفوتِك

اكيد لازم فـ يوم ترجع

عيونِك تاني تتنفس

و تِعدل كل شيء مقلوب

و تُلقُط للغلط كادِر 

و اهي ذكرى تفكرها

بوقت جنونها و مجونها

من قبل ما تندم و تتوب

وجهة نظر

اسود رمادي قلبها

يعني ساعة الكره عاشقه

ابيض حدادي فرحها

ضحكه طالعه و دمعه نازله

محتارين فـ وصفها

حتى نقش اسمها

ع الحجر وسط المعابد

كلمه تايهه فـ ارضها

بيت قديم فـ حاره سد

قصر مبني فـ بحر مد

من سكات الليل بتبدأ

صرخه تشكي لحزنها

تشتري فيهم تبيع

تفطم الحلم الرضيع

ع الاماني فـ وسط شوك

شمعتين و التالته طوق

للغريق فـ بحرها

شطها مرسى و امان

للي نفسه يضمها

و اللي خان مالوش مكان

الا تحت رجلها

قالوا فيها كلام عجب

شعر ع الروح انكتب

و اترسم فوق كل ضلع

اللي بس حبها

شمس بتعاتب غيومها

من هجوم حبة مطر

سيرك ابطاله البشر

بالمختصر ...

 لكل بلياتشو حزين

وجهة نظر

تالِت خيانه شِمال

بداية القصه

حُزن و سَبَع مواويل

نِسمه بِطعم الوجع

و الم يهد الحيل

ايام بتضحكلَك

ضِحكة كما البُركان

مصلوبه فوق جزعَك

بالغصب و البُهتان

إلأوِّلَه كانِت

أحلام بلا تحقيق

أسوار و موانع

في كل يوم بتضيق

وِ التانِيَه .. بحر

تايّه على شطُه

حاضِن مراكب خوف

أعمى و مش بيشوف

غير كسرته و يأسه

وِ التالِتَه غِنوّه

فيها الكلام بيموت

ضحِت عشان تتسمِع

بالمعنى و المقصود

كان نفسها تُخرج

من شِفتين أحزان

لكن ما ليها مكان

الا فـ حُضن سكوت

وِ الرابِعَه حُبِك

دايره مافيها هروب

نجمه بضلايه

و اكمنها ايه

عينها بتضوي شروق

مركِب فـ بحر الشوق

جوه القلوب بتدوب

وِ الخامِسَه قلبي

ساقيه و دوّاره

جايبه السما م الأرض

لَجلِك يا نواره

سالِف من الأيام

ساعِة تَمني و عطف

رافِع إيدين الرجا

تِبقي غير إللي إتنسى

من بعد جرح و نزف

وِ السادِسَه عيشنا

كل إللي فات .. مِرايات

إلأوِلَه و التانِيَه ..

وِ التالِتَه بالذات

سيما و بَطَلها الورق

مرسوم عليه قلبين

مشهد قديم و إتحرق

قلبي الضعيف يِتسَرَق

و يزيد جراح و انين

وِ السابِعَه .. نِهايه

شِعر و بِلا عِنوان

سَبَع قصايد شقى

مِتجمعين فـ ديوان

أنا كنت شايفِك روح

و صَديق و سِبحه و صلا

بَعدِك بقيت درويش

هايم شَريد فـ الخلا

بيغني للذكرى

دايما سابِع موال

إللي عشانه إتسَجَن

داخِل قُصور إلكِدب

رابِع وجَع فـ القلب

تالِت خيانه شمال