ابتدى الشيء يبقى حاجه

ابتدا الشيء يبقى حاجه

ظاهره واضحة ع الملأ

بعد موته جوا نفسه

ابتدا يعمل قلق

و اتفق ويا العذاب

ايد ف ايد ولا الصحاب

يحرقو عش السكينه

و اللى يتعب ينفلق

بص شافني قام ضحك

ضحكة مليانه غرور

بالبجاحه مد ايده

يخطف من عيني السرور

شافه قلبي قال حرام

هو غاوي ليه الام

يزرعها ف قلب اللى حبه

و بنار الامه يتحرق

للاسف الشيء خلاص

ابتدا يرسى بسفينته

فوق قلوب المجروحين

شب علا سور مدينته

و ابتدا وقت الدموع

انطفي يا شموع ...

سلمي مافيش رجوع

خلاص براحنا انسرق

اتسجنا باقتداره ...

غصب عنا جوا ناره

و انفتح للحزن باب

طل منه بحر عذاب

بيشد فينا للغرق

ابتدا الشيء يبقى حاجه

ظاهره واضحه ع الملأ

و ليه بنخاف

و لإمتا هنفضل نتعاهد

ع الحب و احنا بعاد

بنظرات عيونا بنتواعد

و لسه مافيش بينا معاد

خجولة حبيبتي انا عارف

لكن اخجل منها بكون

اصاد عينيها ع الشفايف

كلامي بيبقى مسجون

و يدي ترتعش لما

افكر المس ايديها

و قلبي يدق مييييت لأه

ساعة ما الشوق يناديها

و اشوفها من بعيد واقفه

بلهفة و شوق متعذب

تقدم خطوة و التانية

تسافر بيها و تهرب

و نرجع زي ما كنا

حبايب بس ف الاحلام

نعشق بعض بالنظرة

و عيونا تقول احلى كلام

 حبيبتي لامتا راح نفضل

على حالنا كاسرنا الخوف

بنخنق عشقنا بايدنا

و نقتل حبنا بكسوف

تعالي م الكسوف نهرب

و نشد حلمنا لنّور

خطوة ورا خطوة نقرب

هنوصل لو بينا الف سور

تقدر ؟

تقدر ؟

ترسم نجم بضي حقيقي

مش مخنوق ولا متداري

و تعكس ضيه نور ف طريقي

يهزم جيش العتمه اصادي

تقدر ؟

تمسح دمع الاهه م الاحزان

و ترسم بسمة فوق شفايفها

ترجّع حلم حلمته زمان

حقيقة اصادي حاسسها شايفها

تقدر ؟

ساعتها انا هرجع ليك

و ابدر حبي ورود حواليك

بس انا عارف مش بايديك

يبقى توفر تعبك و إمشي

فوق من وهمك و ماتحلمشي

ارجع ليك

انا انسان

ما بين طموحي

و بين وصولي لبر امان

الف سور

و ايادي كتير متشبكة

خانقة ملامح شمس يومي

ايادي كتير

عاشقة اضطرابي

عاشقة اضطراري

لرحيلي

لارض بلا عنوان

و احساس مخيف

سخيف

بيهد فيا

بشواكيش فولاذ

و عيون ازاز

 بصالي

بصة العميان

و مركب قديم

عديم الشكل

بلا صاري ولا مجداف

بلا هادي لطريق مجهول

ولا عراف

و انا غارق

 ف عرق يأسي

شرودي ناحت

على جبيني تكشيرتي

و حيراااان

جوايا سؤال

محال ...

مالوش جواب

 و ذكريات

لحب غاب

مفتته قلبي

فوق عتبة لانكسار

مكحلة عيني

بناااااار

و انا ف الاصل

مستسلم

و متلجم 
بمييت لجام يمنعني

 م التفكير

ف التغير من حالى

و اوصالي بتتقطع

بحجر صوان

انا انسان

و كان نفسي

طموحي يوم يوصلني

لبر امان

اعيش و اكتب امانيا

على رمالك

يا ارض الخير

ليه للغير

فاتحة دراعاتك

و انا اللى اسمي

على اسمك

بينك و بيني مطوله

ليه مسافاتك

لا عندي طموح

بجناح يطير

يعدي
 سور الممنوع

و لا ابن امير

ولا بيدى

 معجزات يسوع

انا عبد فقير غلبان

انا
 ا ن س ا ن

اخر الصف

 

انا اللى مش مكتوب

ولا محسوب بين الخلايق

و مركون ع الرف

عايش بنص ضحكة

و قلب حزين

عايش و مش فارقة

تروح او ترجع بيا السنين

عايش كما الاوهام

مرزوع م الايام

  ميييييت كف و كف

فجأة لقيتني بتنفس

عرفت اني حي

شوفت شموع سودا

لكن .......

كان ف اخرها ضي

و نسيم متبسم

هواه بيغني و يقسم

طااااار و عليا هف

قمت صرخت بعلو الحس

انا مش حالة و لا عاله

انا موجود بتحس

و لقتني طاير بجناحي المكسور

بلهفة سابقة احزاني

لهفة ....

شدت عتمتي للنور

قلبت روحي و كياني

كتبت اسمي و عنواني

على ايدها

برقة و لطف

اخدني جمالها للجنة

نساني النار اللي انا فيها

نساني ايه كنت اتمنى

قبل ما اشوف انا عينيها

مديت فـ ايديا

نفسي اطولها

فـ حضني اخدها

مدت ايدها

شاورت ....

لكلام مكتوب على بابها

اول واحد يوصل لي

هو اللي قلبه هيكون لي

معرفش انا ايه اللي حصل لي

لقيتني بتهته بكلام مقلوب

و انا مغلوب على امري

كإني شريط و سف

اصل انا واقف

فـ اخر الصف

 

شاددني حبك

 

شاددني حبك

لاوهام و كلام ما يتصدق

و حنين ف عيني مخليني

حاضن احلام ما تتحقق

شاددني حبك

مقيدني بنور كداب

و بحور عذاب قتلاني

مراسيها معنداني

و برغم شوفك لاحزاني

 ما اهتز خوفك

 و سايبني اغرق

شاددني حبك

و انا بيه مغرم

 لكن محروم من النسمه

  و البسمة اللى تفرحني

احضانه سكاكين بتجرحني

و انا صابر

عايش عابر سبيل على بابه

لا يوم حنيت ولا اتمنيت

في لحظة فراقه

و انت بظلمك متجافي

جواك القسوة و مش صافي

و اخلاصي ليك ولا يفرق

شاددني حبك

و مش قادر

 اغادر موانيك

انا اتعودت على غدرك

و الشر الساكن ف عينيك

و اخاف لو غيرك حبيت

يضل ... زي ما انا ضليت

و ف بحور جراحي يغرق