نفسي اكتبلِك

نفسي اكتبلِك بس انا عارِف
ان كلام الدنيا بحالها مش هيكفي
مش هيقضي وصف للمسة ايدي و كفي
لِضَي عِنيكي لما بيُشرُق ويّا الشمس
لما بيلمِس خَد الليل فيبكي نجوم
نورها يِصَحي قمر مهموم كان صابُه اليأس
نفسي اكتبلِك حاجه اكيده و مش احلام
حاجه بتجمَع شوق الدنيا فـ بحر كلام
يغرَق قلمي فـ وسط حروفه و يبدأ هَمس
فوق اوراق تتمنى عِنيكي تشوفها فـ مَرَه
او تقراها فـ سِر سُكاتها و لو مُضطره
او تمحيها بـِ لَمسِة إيد وقتها هَتحِس
إنها فعلا كان ليها قيمه
علشان اجمل ايد فـ الدنيا
لَمَسِت طَرف حروفها و دَفِت 
خوفها فـ ثانيه
و بقِت فعلا شيء يتحَس

وحشتيني

كإنِك نَفسي او اكتَر

و نبض فـ قلبي بيفسَر

معاني لدُنيتي الحلوه

لكن عيني بِتستخسَر

و تقفِل فـ الجفون و الرمش

تِنام و تسيبني بَتمَرجَح

ما بين احلامي و حقيقتي

كما سكران بِيطَّوَّح

فـ قلب شوارع اللهفه

و لما الليل

يلملِم عتمِته فـ جيبه

و يفرِد ع السما ضِحكه

بلون الشمس

يزغزغ نورها فـ كياني

و القاني على بابِك

بموت من فرحتي بيكي

و ضمِة روحي لِاديكي

وحشتيني

يا صبر جنوني ع الدنيا

يا غنوه فـ سكِة الاحزان

بأعيش فـ بعادِك الثانيه

سنين قسوه على حرمان

ياريت يا عيوني تتحَني

بنور ضِحكتها و تسافري

بعيد عن دُنية الاحلام

و تاخدي الشمس وياكي

عشان مش قادِر إني انام

و اسيبها يادوب و لو همسه

دي لامسه القلب من جوه

و بقتِل نفسي لو اطاوعِك

و قتل النفس والَّه حرام

فالصو

مش بالطيبه ولا بالقسوه

او بِزِيادِة نون النِسوه

عَنده فـ قايمة لإشتغالات

ممكن تِوصِفه إنه رومانسي

او مِتعذِب و عليه مَجني

من سِتات او حتى بنات

و مش بالظاهِر لأ بالفعل

او بكلام مكتوب بـِ الشِعر

تِقدَر تُحكُم ع الانسان

إنه جبان او حاجه تِسُر

يعني بلاش تتسرَع و اصبر

لما يبان على شكله و اصلُه

ياما كتير كان ليهم قيمه

بس خساره طلعُم فالصو

بترجى فيكي

مُفتَتَح

بَترجى فيكي ما توجعيش

كل إللي باقي بـ إستياء

إزاي بـ حُضنِك ما تشوفيش

دَمع اللُقا وقت الفراق

.............................

إزاي ضفاير حلمِنا

تِنزعها دَقِة مستحيل قلب الوجع

تِحرقها ضِلِة شمس ليل عايشه فـ بِدَع

بترجى فيكي

كل العيون قبل العمى

قبل اما تِهرب من خيالها للسما

قبل اما تِزرع حِلمها

في سنابِل البُعد البغيض

قلبي العبيط مابقاش مكانِك للأسف

بقى للغواني المُستباحه ع الملأ

حتى إنكَشَف

صوتِك في ساحِة موتُه رامياً بالوداع

مَديت إيديا بشوق مجازاً و إفتراض

اكتِب طلب مُتمنياً مِنِك سماح

و نسيت بإن الحُكم شامِل بـ النفاذ

و إن افتراضي آخره دَبحاً بالجراح

...............................

مُختَتَم

و كإني حباية ذنوب

مِتلضمه فـ سبحِة تَقي

كل اما بيعدي بإيديه فوقها يقول

يارب لُطفَك نَجِّني

بترجى فيكي تِمَزَّعي

توب الغواني و تلبسي دمِعة كسوف

حُزنا على قلبٍ تَرَدى

ساعِة ما قلبِك ودعه فـ اصعب ظروف

مش مستهله

بِتزغزَغ نَفسَك على إيه

هو الضحك كمان بالعافيه

شوفلَك حلم و حقق فيه

و بلاش تِدفِن روحَك صاحيّه

صدقني انا قلبي عليك

مش عايز يأسَك يناديك

او يزرع احزان حواليك

و عيونك تسكنها الدمعه

بتزغزغ روحك ع الفاضي

مش بالضحك هتقدر تنسى

مين فينا عايش من غير ماضي

شاف فـ حياته ضحكه و بسمه

اسمعني و من غير تفكير

افرد فـ جناحك بقى طير

ما تعيشهاش على طول للغير

دنيا غروره و مش مستهله

ساعات

ساعات بضحك على الاحزان

و برسم فرحه فوق وشي

كما بلياتشو بيداري فـ تجاعيده

و بتحايل

على ايدين السما تطبطب بحنيه

برغم اني اكيد عارف

ماليش فـ الفرح غير دمعه

و ضحكه بس مكبوته .. و منسيه

و بكتب للامل غنوه

لكن صوتي

بيبكي فـ اخر الكوبليه

فباقلب غنوتي لإفيه

و بضحك ضحكه براني

و باضرب كف ع التاني

من اللي انا فيه

و لما الحلم يسرقني

من الدنيا و يرميني

فـ حضن الناس
اسافر فـ الوشوش يمكن الاقيكي

لكن من خوفي بتلخبط

والاقيني كده مِخبَّط

على قلوب رافضه تعشقني

فيوجعني الحنين ليكي

هَقلِب نَبي

أنا شَكلي كِده هقلِب نَبي
منا أصلي تايب من زمان
عن اي معنى مُهين أوي
مش ضعف لا ولا مَشيَخَه
و حبِة كَسَل على انتَخه
كل الحكايه ان الحياه
بَدأِت تِحقق مَطلَبي
و الدور خلاص مابقاش يليق
على حَد زاهِد مُستَقيم
كات حالته جيم وسط الطريق
و اما إنتهى بقى فـ السَليم

بَقيت شَهيد

يأسي إللي كان هيإمِني

فـ صلاة جنازِة عِشقها

تاهِت ملامحه من سُكات

ساعِة ما نَدَهِت يا وَلَد

قَرَب هِنا

إغسِل همومَك بالفَرَح

أنا لسه فيّه الروح طموح

إيّاك تِروح

بَصيت لَها .. ضِحكِت و ماتِت قهقهه

نِزلِت بِعُكازها القديم

ضَرباً على كِتفي إتوَجَع

قلبي إتفَجَع

رغم العَجَز حَسيت بِقِوِة 100 جَبَل

و أنا جَنبها مَيِّت خَجَل

علشان فـ يوم

فَكَرت إن الموت خلاص قَرَب لَها

قُمت إرتَميت فـ حُضنَها

ضَمِت أوي

و لقيتني مولود من جديد

شُفت فـ عينيها جَنِتي

و الضَمّه كانت ع المقاس

لما الرُصاص

بَلَّغها إني بَقيت شهيد

عَيِّل شَقي

طول عمره كان عَيِّل شَقي

عاشِق و كات نظرة عينيه

دايماً بِتحكُم ع البشر

قبل اما تلمسهم ايديه

فَكَر بِقلبُه فـَ قابلِتُه

قرر يكمِل سِكِته

مع قلب فعلا حَس بيه

كان حَب فيها إكمِنها

قالِت بحبَك بَس ليه

اتاريها كات بتقول كده

و فـ سرها بِتِضحَك عليه

و عهد الله

و عَهد الله ...

مافيش فـ عيوني إلا إنتي

ولا لِغيرِك فـ قلبي حياه

يا مَرسى لروحي و سفنتي

********************

يا شوق مرسوم على نبضي

بيسكُن دَمي وِ وَريدي

يا تَنهيدي

في ليل الغُربه و الفُرقه

يا روح سارقه الحياه م الموت

و صوت عاشِق مواويلي

و لو قلبي نده قلبك
و قال عاشقك يكون كداب
عشان عشقك في تكويني

بشتاقلِك و انا جنبِك

و بحتاجلِك

و انا نايم على كفِك

بضُمِك رغم كل البُعد

و الاقيكي بِتوفي الوعد

و تجيني في احلامي

نعيش الدنيا فـ ثواني

و يبكي الليل

عشان ما قِدِرش يكتبنا

مع المجاريح

ولا المقسومه سِكتهُم

و عشاق بس فـ سُكاتهُم

بدون تَلميح