قلب انتيكا

غلطة عمري اني امنت
لقلب قديم قوي و انتيكا
اديتلة حياتي و ليه سلمت
قلبي الاخضر الفبريكا
قولت اهو جرب قبلى و حلمت
معاه بحب ولا افلام امريكا
بس بسرعة فيه اتصدمت
لما لقيته حريف بولوتيكا
فعلا غلطة منها انا اتعلمت
و من حياتي مسحته باستيكا
سامحني يا قلبي عمري ما اتخيلت
انه يخلي عاليكا واطيكا
غلطة عمري اني امنت
لقلب قديم قوي و انتيكا

عيش الواقع

بتهرب ليه م الواقع ؟

و تعيش وهم

كإن روحك من ازاز

قافل نفسك بمليون حلم

كما لو كنت صورة في برواز

خلي حياتك جوه الواقع محفورة

و ابني لها حقيقة شديدة

مش على هوا لأ فولاذ

احلم بس الحلم ما تسيبهوش

نجمة متعلقة ف خيال

خلي الحلم ع الأحجار منقوش

بالإصرار مافيش شيء محال

ساعتها هيبقى الواقع بنسبالك

شيء عادي مش إعجاز

.......... عيش الواقع

غيرت من نفسي

عشان نفسي

غيرت من نفسي

و رضيت بالمقسوم

بنيت جبل حقايق

و وقفت عليه انادي

غيرت نفسي يا خلايق

و خلاص من الساعه دي

مابقيتش انا موهوم

فصلت من القناعة

توب على قدي

دوست برجلي الجشاعة

و حضنت ما في يدي

بنفس صافية و من غير خوف

عينيا مابقيتش تشوف

غير المقسوم .....

داريت جوايا المي

و ابتديت ارسم ملامحي

و ادوس بفرحي
على جرحي

و العن الهموم

عشان نفسي

غيرت من نفسي

و رضيت بالمقسوم

تعظيم سلام

تعظيم سلام

لكل شئ

 حلو في حياتي

لصديق وافي

و لقلب صافي

غير حياتي

تعظيم سلام

لكل دمعة

كان سببها فرح

و لكل ايد اتمدتلي

تداوي جوايا جرح

تعظيم سلام

لكل لحظة فراق

ودعت فيها خاينين

و لكل احساس باشتياق

قربني من قلب كله حنين

تعظيم سلام

تعظيم سلام

اشواك الورود

زودي الحزن وجع

إفرحي لحظة شرودي

و اندهي على الفراق

ياخدني لابعد حدود

احرقي كل مرسى

عليها قلبي يرتاح و ينسى

و اقتلي جوايا الشوق

قبل ما احن و اعود

مش عايزك تندهي

عليا و تعطفي

انا عايزك تختفي

من حياتي و الوجود

كفايه كدب بقى

و وعود متزوقة

و اماني متعلقة

باشواك الورود