للذي هو فات

الواد ابو ضحكه وَردي

و رموش زي اللولي

بلاقيه دايماً فـ مرايتي

يشبه عرضي و طولي

احزن يفرح و يغيظني

ابكي يعَلّي الضِحكات

اصرخ و اقول مخنوق

يقلبها معايا افشات

اتاريني مش واخد بالي

انها حبِة متاهات

بتشدني دايماً لما

اشتاق للذي هو فات

ايام يا حبيبتي جميله

ايام و ياريتها تعود

ايام حضنِك و حنانِك

كان قلبي عليكي مسنود

و المرفوض كان مسموح لي

و الجنه كانت ابيات

فـ كتاب الشعر بِخَطي

بكتب لعينيكي غِنوات

و ساعتها انا كنت الواد

ابو ضِحكه و رموش لولي

لكن مـ الحزن اهو مات

اول ما ايديكي سابوني

بلياتشو

الكل قال إنَك بِتتحدى العِلَل
علشان تمللي بضحكِتَك هادد جبال
و ما يعرفوش إن إبتسامتَك دي خَلل
ادام وجع خلاك بِتمشي على الحِبال
صابِر و سالِف مـ الغياب حبِة لُقا
مِتبروِزين على باب رجوعَك للحياه
بلياتشو كداب و الحقيقه مُزيَّفه
و الكِدب ضِحكه بِمعنى كلمِة آه

إنفلاتَك

إنفلاتَك مِن سُكاتَك
يعني عين العقل لَما
ينسِرِق حِلم فـ حياتَك
عِشت مُخلِص ليه بِذِمه
إنفلاتَك يعني ثورة
ضِد أمنَك و إنت راكِع
يعني رَفضَك للمؤامرة
رغم إنَك كُنت تابِع

طبع فيها

إنشغالها بحد تاني
مش خيانه منها لا
أو عِناد فـ قلبي يمكن
تملكه طول الحياه
إنشغالها طَبع فيها
و الطِباع فينا بِتغلِب
فجأه نِلقى اللي شارينا
مايساويش و عليه بِنقلِب 

كُنت ......... و كُنتي

آخر ركعه فـ حُضن عينيكي

كُنت إمامِك

قبل سلامِك كُنت باسلِم

كُنت فـ قلبِك ايوه معلِم

مش بكلام شخبطه ولا فالصو

فوق سَكَنات و كَتايِب رمشِك

ولا تنهيده بطعم النار

تطوي نهار قلبِك فيجِف

لأ ..
 دَنا كُنت بريء و باشِف

نور دُنيتي من نِن عينيكي

و امشي فـ ليلي الاعمى مِفَتَح

شايل كل مدايِن حِلمِك

جوه عيوني و فيهم باسرح

و على خدودِك بلضُم حلمي

بدموعي اللي بتنزِل منِك

و اشرب فـِ كاسات

خوفي و ابات

مِطمِن و انا جوه فـ حُضنِك

آخر ركعه فـ حُضن عينيكي

و قبل شيطانِك ما يخليكي

بقلب حديد

كُنا فـ كل دقيقه بنخلق

حُب جديد

كُنا بنرسِم ع السماوات

ارضنا و نعيش

كُنا بنكسَر فـ إنهزامات

لحظات الطيش

كُنت .......... و كُنتي

بس تعبتي من المِثاليَه

و ضحيتي بيا

فـ آخر تِتر مسلسل كدبِك

بيعتي طريق حلمنا مع إنِك

محتاجه لسه لحبة قوت

يسندوا جوعِك

وقت طلوع روحِك فـ الموت

رُبَّ

رُبَّ كلمه عليك غريبه
تشرح الموقف تمام
تمحي اي شكوك و ريبه
كات مِصحباك ع الدوام
رُبَّ غنوه مش حَبِبها
يلمِس كلامها دُنيتَك
مهما كان اللى كاتبها
مالوش علاقه بحضرتك
رُبَّ سالِب يبقى موجب
رُبَّ موجب يبقى شاذ
رُبَّ واحد من عيوبَك
يبقى م الناس العُزاز
رُبَّ ناس قديمه ماتِت
كات بتدعي كتير عليك
رُبَّ لما تموت تلاقي
إن موتَك راحه ليك

مجرد كلام

بتضحك عينيكي

فتِرجِف مشاعري

و الاقي فـي شِعري

كلام ما انكتب

بحبِك ادَب

و طيبه و كسوف

بحبِك بِخوف

و احبِك سحابه

دموعها الندى

و شمس فـ عيوني

ساعِة ما الليالي

تعيد نفسها

بحبك زِحام

و دوشِة كلام

مابين السطور

بحبِك قصور

راسمها فـ خيالي

و حبِة أغاني

بصوت المطر

بتضحك عينيكي

فتِرجِف مشاعري

و الاقي في شِعري

كلام مستحيل

بحبك سبيل

و احبك في كل الثواني ساعات

بحبك سُكات و احبك حنين

بحبك سنين مرِت و جايه

و بعد اما اموت

لكن فـ السكوت بحس بامان

كإن اللى بينا مجرد خيال

و حبِة مُحال في احلامنا بس

بتضحك عينيكي

فتِرجِف مشاعري

و الاقي فـ شِعري

حيره و قلق

مجرد كلام بدمع القلم

 فوق الورق