طريق حُبِك

طريق حُبِك

مالوش اول ولا آخر

و انا حاير مانيش عارف

غريق وللا على مرسى

شهيد وللا ماليش جنه

عايش عابر سبيل يمكن

ضعيف و انا بيكي بستقوى

مادد عيني لاخر الشوف

و مش شايفِك

ماليش فـ طريقِك الا الخوف

لكن عايزك

طريق حُبِك

برغم الشوك انا همشيه

انا م الشوق اوي ميِّت

و فيكي تملي مش بلاقيه

يا مغصوبه على حُبي

يا معصوبه العينين فُكي

غشاوتهم

انا عمرى ما غشيتهم

و كنت بريء

و الــ 1000 ــف صديق

فـ وقت الضيق بيضحكلِك

طريق حُبِك

بينساني ..

و ينسى جموح خطاويا

و روح لطموح كانت فيا

شايلهالِك

لكن برضو هعيش ليكي

و مهما تزيدي فـي قساوتِك

تزيدي برضو فـي غلاوتِك

و اموت فيكي

حاول

حاول تعديها

كل الصعاب سهله

بس انت تنويها

و تسيبها للمولى

طول ما الحياه قارب

امسك فـ مجدافها

هتعيشها ليه هارب

و اليأس يخطفها

اوصل لشمس الامل

و ارسم على خدودها

بوسه تدوب م الخجل

و توفي بوعودها

ايّاك فـ لحظة يأس

تمشي الطريق بالعكس

خلي الثقه بالنفس

فارده كيان عودها

بَطَّل تفكير

بتبحلق عينك فـ حاجات

ماهياش ليك ..

بتعدي عليك حبة اوقات

و الحزن ماليك ..

عايش فـ حياتَك موهوم

بحاجات بتزود فـ هموم

و حاجات ملهاش اي لزوم

كانت فـ ماضيك ..

ايه يعني شايفها مع غيرك

ايه يعني شاريها و بايعاك

ايه يعني بتداري عيونها

و بتعمل ال مش شيفاك

ايه يعني تعيش و انت مصدق

انك هتحقق امانيك ..

ايه يعني الكون منك يسرق

فـ حاجات كانت ملك ايديك

ايه يعني حاجات تانيه كتييير

احسن لك بَطَّل تفكير

و اتعود على انك تضحك

و ارسم فرحك ..

فوق كل مافيك

و بلاش بَحلَقه شوف ادامك

و ياريتك تبدأ مـ الاول

و كإنك ولا يوم حبيت

و حلمت و حلمك بقى خيط

مِتعلَق بِخدود اوهامك

اصل الايام رايحه و جايه

تضحك ثانيه ..

و ساعات تضحك .. بس عليك

عايش صورة

راضي و مِتمَزِج يعني !!

بحاجات كنت بتنكرها

و حاجات كانت بتسبب

توهه فـ مُخَك و بتِقلِب

بجنون وقت ما بتشوفها

ايه غيَّر فيك ما تقولّي

ولا انتَ معاك مش فارقه
 عايش و كإنك صوره

او شماعة و مكسوره

مِتعلق فوقها وشوش

كومبارس و بس مالوش
غير كلمه و مش مذكوره

كومبارس فـ دور انسان

واخد فـ حياته بطوله

لكن فـ الاصل جبان

عايش و عينيه مذلوله

حاول كده مره تعيش

من غير كدب و تزييف

حتى لو حِلمَك كان ..

فـ الدنيا بسيط و ضعيف

احسن من انك تسجِن

فـ حياتَك جوه مُسلسل

بَطَلُه فـ الاصل مش انتَ

و ظهورَك فيه تخاطيف

انا عارف

انا عارف انك تقدر
تبعد بسهوله و تنسى
فمافيش داعي تهددني
انك على قلبي هتقسى
منا ياما كتير من قبلك
ضحيت بقلوب حبيتني
ضحيت ولا مره بكيت
و ندمت و قولت ياريتني
اتعلم بقى و اسمعني
لو عايز تبعد يعني ؟
خليها فـ سرك احسن
و ابعد و بلاش تخنقني

صباح الورد

عايش عـ القد

و فارش حلمه سجاده

و كالعاده شريط الحلم يتقطع

من قرصة برد

ايديه المنحوسه متعوسه

بيرمي الزهر قاصد جوز

يطلع فرد

لكن دايما بصحكه بريئه مرسومه

على وشوش الرجا و الخد

بيجبر دنيته العتمه

تشد شموسها و تِصبَح

عليه بالورد