التوبة

التوبه لو فالصو .. يبقى الشيطان صادِق
إنَك قِدِرت تبيع .. جنه لإيدين سارِق
و إنَك عيار فالِت .. فوق سبحتَك مكتوب
مهما تتوب فاسِد .. دايب فـ بحر ذنوب
ملضومه نار كدبك .. جوه العيون عناقيد
حُر و طليق لكن .. لازم يكونلك سيد
مع ضلُه تِتمادى .. بشياكه و سذاجه
زي القرود لما .. فـ السيرك تبقى عبيد
و التوبه لو صادقه .. يبقى الشيطان كداب
لو قال عليك قاصِر .. و العقل منك غاب
و إنك اكيد راجع .. لما يضيق الحال
لو حلمك اتبدل .. من نور لنار و عذاب
مابقاش فاضلك غير .. خطوه و طريق غدار
و طريق بنور مبدور .. مرصوف بضي نهار
و انت عليك تختار .. بين النعيم و النار
ولا الذنوب طبعك .. و الطبع فيك غلاب

مانيش درويش .. اغنيه

مانيش درويش .. ولا عايش كإني مافيش
انا افكاري جوايا .. بتمنعني بصدق أعيش
في وسط حاجات ماليش فيها .. و لا ليها اكيد لازمه
تسبب مشكله و ازمه .. في لحظة طيش
باعيد حسابات .. لاحلام فاشله و انهزامات
و لولا ثبات .. ايماني بربنا ما هعيش
انا ممكن اكون عاصي .. و ضعفي فـ ذنبي راميني
لكن بالفطره بلقاني .. باقول يارب نجيني
خلاص توبه منا انسان .. و اسمي دا جزء م النسيان
بيبعدني كتير عنك و برجعلك .. عشان غيرك يارب ماليش
اكيد غيرك يارب ماليش

شهقة صمود

مُفتتح
بحبِك
النص
لِساكي برضو مصدقه
سهمِك على قوس الوداع
لسه إنطباع خوفِك من الماضي إللي فات
ساكِن بيبان مد الايادي باللقا
لِساكي رغم التوبه برضو بتعشقي
نصل السيوف إللي إرتوِت من قلبي يوم
مليت سكوتِك و إنتي شايفه المستحيل
مادِد إيديه بيأكِد البُعد بـِ بِعاد
مليت عِناد سجدِة دموعي 
بين كفوف الامنيات
طب اعمل ايه
اكتر من إني برغم تيه روحي التقيت
شهقِة صمودي بتندهِك
دقِت طبول حرب التمني فإقبلي
خطوِة رجوعي و التقدم للأمام
رغم إنهزامي لسه قلبي بيعشقك
و الموت في قربِك عندي اجدى من السلام
مختتم
رغم الجمود إللي إنتي فيه
لسه قلبِك أغلى شيء 
أنا باعشقه

بحبك لانك

كاسات الغواني و اكل الحرام
و كَسر الإراده بحبِة كلام
و جوع الفقير .. مِخلي الأخير
خبير إقتصادي بيملِك زِمام
عساكِر حياتنا برتبة شهيد
و شُغلِة ولادنا جواري و عبيد
و سجن البراءه بناسُه الحُثاله
بيشبه مارينا بدون إتهام
كراسي القهاوي فـ حضن الشوارع
بطلها التكاتِك و جيلها اللي طالِع
و لبس المحزق و كِدب المِصدّق
مجونه و شايف .. بإنه إمام 
....................................
و قلبي اللي سافِر فـ حُضنك تمللي
برغم التجني .. رفض لإنكِسار
برغم اتهامه بكفر التزامه
في ثورة خضوعِك عطاكي انتصار
...................................
بحبِك لإنِك سبيل للحياه
و رغم إنفعالي ماليش إتجاه
يغيَّر في ذاتِك و يقلب حياتِك
لموت اضطراري بدون اي اه
سنابِل إيديّا بتِزرع عينيكي
جناين شموسها بتنده عليكي
تِضِلِك و تهلِك عدوِك و همِك
و نورها يدلِك لطوق النجاه
......................................
دي مركب رجوعِك بانيها بضلوعي
و ضحكِة ملامحي راسمها بملامحِك
تسافِر شموعِك تقيدلِك شموعي
و مهما بتقسي عليا بأسامحِك

انا عن نفسي

في شيء متأكده اوي منه
علشان كده عمرك ما زعلتي
هو إنِك زيي ما هتلاقي
و لذلك ليا استسلمتي
و انا عن نفسي فرحان جداً
اني لقيت اللى بتفهمني
واحده بتقتل كل همومها
لما عينيها تلمس قلبي
بس انا عايز اقولِك حاجه
اوعي تخافي مني فـ مَرَه
علشان انا زيِّك يا حبيبتي
عمري ما هلقى بعدِك قَمَرَه
ضيَها يطوي الحزن و ليلُه
ضحكها يهزِم اي جراح
همسها لو خطوتي يوم تاهِت
فـ الضيقه بلقاها براح

الحياة مسرح كبير

اللي قادر يبقى حاجه
و اللي مش قادر يكون
بين صحابه حتى بسمه
او دموع جوه العيون
و اللي عاش العمر جوكر
بين قلوب كل البنات
و اللي مات جواب مِسوجَر
جوه منه كتير حاجات
و اللي شاب قبل الاوان
و اللي عمره ما شال فـ هم
و اللي عاش جواه حنان
بس غيره كان اهم
كل دول جوه فـ حياتنا
و الحياه مسرح كبير
اللي عاش بلياتشو فيها
و اللي واخد دور امير
و النهايه الحلوة دايما
للي مرتاح الضمير

مالكيش بديل

و بتبعدي
كل اما اقرب و ابتدي
المس خدود الحب فـ عيون لإشتياق
كلمة فراق
منقوشه ليه فوق بسمِتِك
و مِشَتِتِك خوفِك اوي
نِفسي ارتوي من خمر قُربِك
لو رياء
يأم المداين عاليه فوق
بس الادان مدبوح بنصل المستحيل
مالكيش بديل لو ترحلي
و تسيبي طيفِك جوه حُضني يمزّعه
و تزيد مسافات التمني و الرجا
و القلب روحه تودّعه
مانتي الحياه و إنتي أنا
إنتي الغُنا
وقت السكوت ما يكون قدر
مكتوب على كل البشر
او فرض يمكن ولا سُنه مؤكده

موسِم وداعِك

مُفتَتَح
******
صوتِك سلاح ضد الالم
ضد الصراع اللي إحتَدَم
بيني و بين جرحي العميق
يا شعور رقيق
دَوِّب فـ آهات الشجون
سَكِّت دموعي فـ العيون
و بَقيت غريق
فـ بحور مداكي للابَد
قلبي فـ ايديكي بيتولَد
إنسان برئ
....................................
روحي اللى سانده بعكازين
صبرِك خلاص ابتدِت
تترجى في ساعات الوداع تصبر سنين
موسم وداعِك قد ازَف
و باقيلي من طيفِك انين
و رجوع لاول خطوه فـ بداية الالم
و حلم فـ منام تفسيره برد فـ ليل عقيم
مافيهوش قمر
ازاي هيرجع ينكسر 
نبضي اللي عاش على صوت غناكي بينتصر
على كل زيف
لأ و الطريف
غمزِة عينيكي بمرقعه
و ساعات دلع مالهوش مبرر او سبب
واضح اوي من مكيجِة شفِة جنابِك بالسكوت
لو كان في موت قلبي سبيل
لنجاة سماكي من الغيوم المرعِده
فانا باعتذِر عن مفتتح 
اول قصيده اكتبها ليكي من زمن
و انا مش ذليل

آن الاوان

كفنتي دمعِك بالخضوع
و سجدتي بين ايد الخطر
و المنتظر مكتوب عليكي تودعيه
من قبل حتى ما يتولِد
يام السواقي العطشانين على نهر خوف
مليت كسوف نَفسي و انا
باشرب خطاياكي فـ شجون
باشرب لاخر نقطه فـ كفوف العطش
من غير ماخون
يا شموع نذور الاضرحه 
يا مبرحه فـ طعنِك اوي
ليه تسجدي للخُرس في اوان الكلام
دمع العيون المستفيض
من ضَرع حيض قلبك خلاص
اصبح حرام
فماتوهميش نفسك بحبة اوليا
كانت صلاتهم سخريه منك زمان
آن الاوان تبكي غنا و تودعي 
كل اللي سابِك و اللي خان

كُلُه بثوابه

حَبِبتَك الخاينه
دي صَنف من الحريم
بيفوت عليه الوقت
و بيبقى فيلم قديم
معروض فـ 100 سينما
ترسو و بسعر رخيص
و اهو كُلُه بـِ ثوابه
علشان الكل يهيص
و حبيبِك الخاين
ده صنف من الرجال
محسوب عليهم نَفَر
بس اعيَّل م العيال
قلبه ده زي الباص
ارخص مواصله فـ مصر
مفتوح لكل الناس
في ليل و صُبح و عصر

مش قصدي

ما تلومش قلوبنا ولا تِصدَّق
إننا كان ممكن بإيدينا
نِكتِب فـ الحلم و يتحقق
راح نبقى انا و إنتَ لِبعضينا

ولا عني فـ مَرَه تقول خاين
و ان انا ضيعتَك من ايدي
علشانَك ضحيت بسعادتي
و رضيت بجراحي و تعذيبي

جايز مافهمتِش م الاول
إنَك مش ليا و حبيتَك
كان غضبن عني و مش قصدي
إحتاجت لقلبَك و ناديتَك

نِكمِل حُبنا وللا

و مش هسأل عن الماضي

ولا بَعدي هتبقي لِمين

و مين كان نفسه من قبلي

يحبِك بس مش قادِر

و بَعدِك حَب ناس تانيين

ولا هسأل عن الاحلام

و هاخُد بس بالظاهِر

و هسمحلِك

تشاوري القلب 100 مَرَه

فـ اي خلاف يكون بينا

نكمِل حُبنا و للا

نفضل عمرنا مفارقين

ديمقراطي

و قلبي بأي شيء راضي

هسيبلِك روحي و براحتِك

يا تسعدي فيها و تصوني

يا تكوني من الخاينين

و انا موافِق

اكونلِك زي ما تحِبي

لكن حاسبي دي مش طيبه

ولا عيبه و غباء مني

ده بس القلب مش ناقِص

يصدَّق و العشَم ياخده

و يرجع بعد ما يسيبك

بدمه و حسرته و المه

و كام دمعه على الخدين

هنبدأ يلا حِبيني

و دا شوقي

سايبلِك حَبلُه ع الغارِب

يا تِغزِلي مِنه توب فَرحِك

يا تِلقي العُمر بالسالِب

هفضل عايش

ما تأنِبش فـ نَفسَك و إنسى
إن انا بعدَك ممكن اخسَر
إنتَ يادوبَك كُنت مُجرَد
تمثال ناحتُه و فجأه إتكَسَّر
و طول منا قادِر اعمِل غيره
هفضَل عايش مش هتأثَر
بس إللي انا زعلان اوي منه
هو الوقت إللي انا ضيَّعتُه
فيك مش أكتَر

مات فِطيس

نَفس حالُه هوَّ هوَّ

من زمان عايش تَعيس

و اما جِه يقلِب فِتوَّه

وِسط ثَوره مات فِطيس

و البوليس حَقق في موتُه

و القضيه خلاص فيشينك

اصلُه كان مِستحلي صوته

ليل نهار و كإنه تَنك

جوه منه بحور كلام

حلم تايه في الزحام

مش رصيد خايف عليه

جوه بوسطه ولا بَنك

كان بإيده يعيش صَنَم

او بَجَم و الاسم عايش

و اكمنه كان واد محترم

مات في قلبه عيار و طايش

و اللي عاش من بعده روَّح

م اللي شافه حزين مِبَلِم

و اما فاق قال بُكره احلى

بس بُكره جِه مِضَلِم

BLACK

باقولَك ايه من الآخِر

بلاش بالطيبه دي تِتاجِر

و فَتَّح فـ العيون و إفهَم

ما عادش في حَد يستاهِل

ما دام ساهِل

عليهُم يسرقوا الفرحه

و يزرعوا فـ القلوب اشواك

بِحُزن و ويل و عتمه BLACK

بلاش إيّاك

تِصَدَّق تاني فـ دموعهُم

ضَميرَك سَكِتُه حَبّه

و علِمُه إنه يتمَرَد

و يفرِد شوك فـ اوجاعهُم

و وَدَّعهُم

بِعُهر القلب مش طُهره

بلاش طيبتُه تِطمعهُم

و ادعيلهُم

رَبِنا لا يِرَجَّعهُم

لكن حاسِب

و خلي فـ قسوتَك رحمه

لِناس ممكن تِكون احسَن

و يُستحسَن

تِحرَص بس ما تخوِّن

وشوش الناس بِتتلوِّن

مع الازمات

كتير اوقات بِتتحوِّل

لكن لازِم تكون قادِر

تِرجَّع ضِحكِتَك تاني

و تِسمَع مني للآخِر

بلاش بالطيبه دي تِتاجِر

و فَتَّح فـ العيون و افهَم

ما عادش في حَد يستاهِل

نفسي اكتبلِك

نفسي اكتبلِك بس انا عارِف
ان كلام الدنيا بحالها مش هيكفي
مش هيقضي وصف للمسة ايدي و كفي
لِضَي عِنيكي لما بيُشرُق ويّا الشمس
لما بيلمِس خَد الليل فيبكي نجوم
نورها يِصَحي قمر مهموم كان صابُه اليأس
نفسي اكتبلِك حاجه اكيده و مش احلام
حاجه بتجمَع شوق الدنيا فـ بحر كلام
يغرَق قلمي فـ وسط حروفه و يبدأ هَمس
فوق اوراق تتمنى عِنيكي تشوفها فـ مَرَه
او تقراها فـ سِر سُكاتها و لو مُضطره
او تمحيها بـِ لَمسِة إيد وقتها هَتحِس
إنها فعلا كان ليها قيمه
علشان اجمل ايد فـ الدنيا
لَمَسِت طَرف حروفها و دَفِت 
خوفها فـ ثانيه
و بقِت فعلا شيء يتحَس

وحشتيني

كإنِك نَفسي او اكتَر

و نبض فـ قلبي بيفسَر

معاني لدُنيتي الحلوه

لكن عيني بِتستخسَر

و تقفِل فـ الجفون و الرمش

تِنام و تسيبني بَتمَرجَح

ما بين احلامي و حقيقتي

كما سكران بِيطَّوَّح

فـ قلب شوارع اللهفه

و لما الليل

يلملِم عتمِته فـ جيبه

و يفرِد ع السما ضِحكه

بلون الشمس

يزغزغ نورها فـ كياني

و القاني على بابِك

بموت من فرحتي بيكي

و ضمِة روحي لِاديكي

وحشتيني

يا صبر جنوني ع الدنيا

يا غنوه فـ سكِة الاحزان

بأعيش فـ بعادِك الثانيه

سنين قسوه على حرمان

ياريت يا عيوني تتحَني

بنور ضِحكتها و تسافري

بعيد عن دُنية الاحلام

و تاخدي الشمس وياكي

عشان مش قادِر إني انام

و اسيبها يادوب و لو همسه

دي لامسه القلب من جوه

و بقتِل نفسي لو اطاوعِك

و قتل النفس والَّه حرام

فالصو

مش بالطيبه ولا بالقسوه

او بِزِيادِة نون النِسوه

عَنده فـ قايمة لإشتغالات

ممكن تِوصِفه إنه رومانسي

او مِتعذِب و عليه مَجني

من سِتات او حتى بنات

و مش بالظاهِر لأ بالفعل

او بكلام مكتوب بـِ الشِعر

تِقدَر تُحكُم ع الانسان

إنه جبان او حاجه تِسُر

يعني بلاش تتسرَع و اصبر

لما يبان على شكله و اصلُه

ياما كتير كان ليهم قيمه

بس خساره طلعُم فالصو

بترجى فيكي

مُفتَتَح

بَترجى فيكي ما توجعيش

كل إللي باقي بـ إستياء

إزاي بـ حُضنِك ما تشوفيش

دَمع اللُقا وقت الفراق

.............................

إزاي ضفاير حلمِنا

تِنزعها دَقِة مستحيل قلب الوجع

تِحرقها ضِلِة شمس ليل عايشه فـ بِدَع

بترجى فيكي

كل العيون قبل العمى

قبل اما تِهرب من خيالها للسما

قبل اما تِزرع حِلمها

في سنابِل البُعد البغيض

قلبي العبيط مابقاش مكانِك للأسف

بقى للغواني المُستباحه ع الملأ

حتى إنكَشَف

صوتِك في ساحِة موتُه رامياً بالوداع

مَديت إيديا بشوق مجازاً و إفتراض

اكتِب طلب مُتمنياً مِنِك سماح

و نسيت بإن الحُكم شامِل بـ النفاذ

و إن افتراضي آخره دَبحاً بالجراح

...............................

مُختَتَم

و كإني حباية ذنوب

مِتلضمه فـ سبحِة تَقي

كل اما بيعدي بإيديه فوقها يقول

يارب لُطفَك نَجِّني

بترجى فيكي تِمَزَّعي

توب الغواني و تلبسي دمِعة كسوف

حُزنا على قلبٍ تَرَدى

ساعِة ما قلبِك ودعه فـ اصعب ظروف