اي فارس و السلام

لو مش حرام 

كنت اوصفِك عاهره و إمام 

كنت ارسمِك فـ عيون حارات كل البلد

قاصِر و حبِت كام ولد 

بس اما تابت م الغلط 

إتجوزِت شيخ اللِئام

وانتى المُطيعه بدون كلام

مستسلمه و مستسهله

و اهو اي فارس و السلام

يملِك زِمام المركِبه

ما يهمكيش لو كان نبي

او حتى موصوف بالغبا

كل اللى همِك طوق و بس

لو حتى حبل المشنقه

مِتشوقه تبقى الربيع بعد الشتا

ولا جفاف و سنين عجاف

جايه بصوت مالي النِدا

مات الندى فوق الورود

مابقيتش قادِر ع الوعود

منا اصل شايفِك مَيّته

مع كل ده ..

بادعي يكونلِك فـ الهُدى

حبِة نَصيب ..

مع اللى قلبِك صدَّقه

و صارلِك حبيب

ثورِة سكوتي

من كااام سنه

مفروشه ضحكة خطوتِك

على ارض عاشقه التوهه فـ عيون الغريب

و انا المُريب اللي انتى رافضاه يفهمِك

او يعشقِك من بين بيبان المستحيل

قِلِة ايمانِك بيا أنا

خلاكي طعنه فـ وسط قلب

خلاكي دَرب

حُزن و وجع و عذاب و ويل

انا مش بعاتِب

ولا باتهِم فيكي و عميل

انا بس باشكيلِك زهَق

و كلام يادوبَك ع الورق

منا اصلي ماملُكش البديل

مش بأدِّعي حبك عشان تتبسمي

ولا تفتحي حضنِك و تاخديني بِعشَم

انا بس عايزك و انتى قاعده بتحسبي

حسبِة حياتِك ابقى حتى من الخَدَم

ثورِة سكوتي اللى انتي خمداها بألم

لازم فـ يوم تِصبَح دليل

للي ارتوى مُرِك و داب فـ محبتِك

و برغم يأسه شايفِك الحلم الجميل

وقت ضَعف

كُنت راسِم صوره ليها
جوه عينِك و إنطَفِت
إختَفِت لما بإيديها
طبطبت فوق جرحي خَف
باعتذرلِك ع الخيانه
و إنكِسار قلبِك بِعُنف
بعتذِر عن كل كلمه
قولتهالِك وقت ضعف
كنت عامل نفسي اعمى
عن حقيقه فـ وسط شوك
كنت شايف فيكي هيّ
رغم ظَني و الشكوك
كنت قالِب حلمي ليكي
بس حلمي فجأه لَف
اعتذاري مش هيمحي
اي دمعه من عنيكي
بس قلبي قبل مامشي
مش هيحلم الا بيكي
و اللي كان بينا هيفضَل
نهر عمره فـ يوم ما جف

يمكن شَبَح

الحياه دي مش مرايه

الحياه دي بس غايه

تنتهي وقت الممات

ساعِة سُكات كل البشر

وقت إنتحار الوقت

فـ عيون الساعات

مُتأكِده ؟

إن صورتِك فـ المرايه مؤكده

يمكن شَبَح !!

طمعان يرجَّعلِك زَمَن

بس الزَمَن

مابقاش خلاص فيه معجزات

و المستحيل له الف ليل

ما بينتهيش بالصدفه او بالامنيات

إمسحي دموعِك كفايه

مش باقيلك فـ الروايه

غير مجرد بس كلمه

و سطر باهت فـ النهايه

و النهايه شيء طبيعي

لقلب عاش يصنع آهات

إكتفيت بفراقي ليكي

بس قلبي مش ناسيكي

مش عشان لسه شاريكي

لا عشان ياخد عِظات

و اللي ماله ذكرى ابدا

مستحيل يبقاله حاضر

و اللي عاش طول عمره ساجِد

بين عِنيكي و المَراوِد

قادر انه فـ لحظة يُكفر

يبقي حبِة ذكريات

إفتعالِك للبراءه

كان سبب موتِك اوام

و إعتمادِك ع السذاجه

كان بداية لإنهِزام

و المرايه

كات مجرد صوره ليكي

جوه دفتر عُمر فات

حظر التجوال

حظر التجوال إللي فـ عقلَك

مانِع تفكيرَك يتقابِل

مع حل لِفزورِة عِشتَك

إللي انت عشانها بقيت جاهِل

عقلَك هيصدي من الركنه

و الرف خلاص مابقاش قادِر

يتحمل فـ عقول مركونه

أو مِتأجره لضمير سافِل

مِتحكِم فيها بغبائه

اكمنها غلبانه و راضيه

بالعيشه الحاليه و الماضيه

او اي كلام لو كان ساخِر

ايه جابِر عقلَك على إنه

يعبُد اصنام لِأحلام فاشله

او يكفَر بِنباهته و فِهمُه

لاجل شويّة أفلام هابطه

حظر التجوال داهِس عقلك !

بُكره يعشش جوه لسانَك

و ساعتها تكون وحدَك اهبل

و تعيش مسجون جوه جِنانَك

وقتها راح تبقى البهلول

اللي إتعلَّق بحبال المُلك

و ما نابه إلا طلاااق أُمه

و جوازها باراجوز فـ السيرك