ملاك

من قبل الاحساس ما بيوصل
و يوَصَّل ..
كل اللي انا قاصده
بلقاكي سبقاني بخطوه
و فاهمه كلامي و مقاصدُه
و قبل ما اعبر عن إعجابي
 بكل ما فيكي ..
القى ايديكي بتحضُن قلبي
و شفايفك بتقول يا حبيبي
اسأل نفسي ساعتها ( ازاي ؟ )
و اكسر ناي الحيره بغنوه
كل كلامها بِيسأل بعضُه
هي صحيح إنسيّه بجد ؟
ولا ملاك مـ السما عـ الارض !!

انا المحقوق

انـا اكـتر حـاجـه بتـعـجـبـني

نرفــزتـك وقـت اما تشـوفـي

لـمتــهــم بـالكــوم حـــواليــا

و عـينيا بتـغـرق فـ كـسـوفي

و يـا خـوفي لو مـرة ناديتـلى

واحـده و رديـت كـده بخيـالي

الـقى عــينيـكي بغيـظ تبعتـلى

تـهــديـد بالـطــرد و نسـيـانـي

و القـانـي بـضحـك و بطـبطب

على غيرتِك و احضنها بشوق

و اتمسـكن و اقـول سـامحيني

آدي راسِــك و انـا المـحـقـوق

بين صحابِك

بين صحابِك و فـ حياتِك

هتلاقيه

إللي ساكن قلبه حُبِك

و إللي عامل نفسه حَبِك

و إللي مش قادر يقولِك

ع اللي بيه ...

إللي مش طايق ملامحِك

و إللي فرحه يزيد بِفرحِك

و إللي مش قادر يجيبلِك

كل شيء إتمنتيه ...

بين صحابِك و فـ حياتِك

هتلاقيه

إللي عيشتي معاه سنين

كلها حب و حنين

و اما الطريق بقى سكتين

ودعِك بدموع عينيه

إللي عمره ما كان فـ بالك

ولا طيف حتى فـ خيالِك

هو ده اللى لما جالِك

يطلُبِك وافقتي بيه

أملي الوحيد

يا كُل حِلم بيهتدي

جوه عيونا فـ وقت نوم

إمتى بقى راح يبتدي

فيلم الحقيقه و فيه نِعوم

يا كل ضِحكه مِزوقه

كل الشفايف إلا أنا

نفسي اشوف لون ضحكتي

و يرُج صوتها فـ السما

و اخرُج بقى

من سجن حزني و الهموم

املى الوحيد نايم بعيد

فـ عيون بِتنده كَسرتي

يا حسرتي ع اللي إرتوى

مُر الهوى .. فـ كاسات سموم

يا كل كلمه مِعصلجه

جوه قصايدي مِلخبطه 

قصدي البريء

يا كل خطوه بِتِنكِسِر

وسط الطريق

يا كل شيء قاسي و خَنيق

انا مُستَقيل و مُستحيل

تِكسرني يوم

رومانسيات

كلمة الحب البريئه

لو دقيقه تسوى عُمر

و السعاده تزيد زياده

قلبي ينسى كل مُر

ايوه نفسي فـ يوم تقولها

او اشوفها بين عينيك

حِس قلبي ليه تِخبي

دانتا عمري وكلى ليك

بين قلوبنا حب باقي

حب عايش للابد

حب عاشق لـِ التلاقي

صعب جدا يتوجد

غير ما بينا انا و انت بس

ايوه قلبي بقلبك حس

و ابتدا بعد السكوت يبقاله صوت

و شروق و شمس

بس خايف يا حبيبي

يجي يوم و نفترق

و اللي كان بينا فـ ثانيه

ينتهي او يتسرق

و اللى باقي م الحنين

يتقلب يبقى انين

و القا قلبي فـ يوم حزين

و فـ نار الامه بيتحِرِق

مدي ايدَك بالوعود

نُبدُر الاحلام ورود

بين سمانا و ارضنا

بين قلوبنا و عشقنا

و بغرامنا و حبنا

يلا نتحدى الوجود

مراكب ورق

كل المراكب ورق 

و انا نفسي اوصلِك 

ما يهمنيش الغرق

 لو اخرته حضنِك

قلبي الضعيف قارب 

و الحب مجدافي 

و مهما نتباعد

 جايلك فما تخافي

هوصل لاخر الكون

 ع الشمس هكتبلِك 

عاشق انا مفتون 

مشتاق و محتاجلِك

يا غربتي حِني

دايب و كلي حنين

عاشق انا و مشتاق

 لعيونها الحلوين

فوقي بقى

مليون حِداد بيألمِك

و مِغرقِك حُزن و دموع 

و اللي انتى فاكراهم طريق

عكس المسار فقدوا الرجوع

عايشين خضوع 

و مِصدقين كِدب و خيانِة إثمهم

نفس المسار و مِكملين

و الغدر ده من طبعهم

يا صابره ليه متحمله

و مِكمله سِكة خضوع

دا انتي اكتمال الازمِنه 

و الامكِنه و شمس السطوع

يا ام انكسار كل العِدا 

مفدِرش حد يكسُرك 

فوقي من التوهه بقى

قبل السنين متبعترك

عطشان و قلبي بيرتوي

لحظة لقاكي مزهزهه 

يا ام العيون مِتكحله

بدموعنا و احنا فرحانين

مالناش جبين نسند عليه

وقت اما نبقى مجروحين 

دا انتى الكلام وقت السكوت

و انتى الدفى فـ قلب البيوت 

و انتي الامام اللى بدعاه

يرضى رب العالمين

اياكي يغيب نورِك

بتبكي الدمع دمي يفور

يهون فرحي .. مادام انتي

حزينة القلب يا امايا

و جوايا بتتفجر بحور احزان

كانت ناسيه طريق قلبي

يا تعبي لما بلقاكي 

ضعيفه و غارقه فـ دِماكي

فـ اياكي يغيب نورِك

ولا يخونك فـ لحظه جبان

يصون نفسه و ما يصونك

بلاش تبكي و انا جنبك

 ما دام النبض فـ عروقي

راح ارويلِك تراب ارضك

انا ابنِك و مش ناسي

 حنان قلبِك ولا قاسي
عشان ابعِد

و اسيبِك للدموع وحدِك

انا املِك و دستورِك

مانيش اوراق بتكتبها

 ايادي الظلم فـ سطورِك

انا الحلم اللي كان رافض 

يزوره اليأس و يزورِك

يا شقيانه عشان نفرح

و عشقانه و لو نجرح

بايدنا و احنا مش قاصدين

ولا فاهمين لكن برضو

بنستنى تسامحينا

تضمينا و نتمنى تلمينا

على مركب حنين ليكي

مجادفها بشوق تِسبق

قلوعها و نترمي فـ حضنك

هايم فيكي

بنبض القلب حسيتك 

و خليتك ..

مابين الاهه و التنهيد 

يا حب اكيد بيحميني 

مخليني بحب الكون 

يا شوق مجنون محاوطني

مغرقني فـ بحر حنان

يا خوف و امان بيسرقني

و يخطفني ..

بعيد عن نفسي و سنيني

يا ضَي عينيا و حنيني

انا كلى فدا قلبك

اسيب الدنيا و اندهلك

محتاجلك و مشتاقلك

يا نور فـ طريق 

يا حلم غريق كده فـ عيني

بيرميني ..

مع الاحلام و يسافر

مانيش كافر..

 بسحر عيونك اللولي

يا عقلي و ظني و جنوني

بحبك ..

 و القلوب تشهد

على قلبي اللى عمره ما مال

غير ليكي ..

انا رحال هايم فيكي

و بأهديكي ..

 وردة حب مبتسمه

و نسمة تطوف حواليكي

تحميكي من الاحزان

مانيش هزيان و باقولك

بحبك .. و اسألي قلبك

إبدأي

إحتمالِك فـ النجاه

صِفر لكن تِقدري

طول ما لسه فـيه حياه

يبقى لازم تصبري

رغم الصعاب إتحملي

لازِم فـ يوم راح توصلي

بس إبدأي ..

و إتامِلي ..

كل للي قبلِك و إنتهوا

إزاي بقوا ..

حبِة سراب تايه حزين

حبِة مشاعر مجروحين

و إتاكِدي ..

من كل خطوه للبدايه

اكسري عيون النهايه

 إفهمي ..
و إتعلمي ..

يعني ايه صِفر إحتمالِك

يعني نقطه ..

و إبدأي تاني حياتِك

بحبِك

بحبك دمعتين فرحه

فـ عيني لما بالقاكي

بحبك صافيه و مسامحه

و سامحه لقلبي يهواكي

بحبك شوق و تنهيده

بحبك قاسيه و عنيده

بحبك كلمه فـ قصيده

بِترسِم حلمها معاكي

بحبك نجمه فـ سمايا

بتهزم عتمتي و ليلي

بحبك نور و ضلايه

فـ بعدك .. لو تفارقيني

بحبك رغم اي الام

بحبك حتى فـ الاحلام

بحبك فعل مش بكلام

و اكتر من ضيا عيني

بحبك ليل مالوش أخر

و سهرايه و كام غنوه

بحبك .. حلم مِتااااخِر

لاحلااام .. كتير حلوه

بحبك تبقى فـ عيوني

يا ساكنه فـ بالي و ظنوني

فـ روحي و عقلي و جفوني

بدونك قلبي ما يسوى

بحبك

ابعد ليه ؟؟

 مادام القلب فـ ايديكي

طب ابعد ليه ؟؟

و اتوه و اغرق فـ دوامه

و اقاسي من جراح ياما

هتسكن قلبي لو سيبتِك

و تقضي عليه ..

طب ابعد ليه ؟؟

و انا شايفِك فـ عيني الكون

منين ماباكون بلاقيكي

و فـ ايديكي ضيا عُمري

و روحي و بسمتي و حلمي

اللي بحلم بيه ..

طب ابعد ليه ؟؟

و انا ليا على شطِك

قصور و مراكب الاحلام

و كااام ذكرى لكاااام مشهد

انا و هي ..

يا ساكناني بحنيّه

و اُغنيّه بِتِشفي آلام

لو ابعد عنك اتحسَّر

و اتكسَّر 200 حته

يموت قلبي بـ 100 ساكته

ولا حدش يسمي عليه

طب ابعد ليه ؟؟

و هبعد ليه ؟؟

مرِت ساعات

 مَرِت ساعات 

 و أنا مِنتِظِر لحظِة لُقاها 

 لحظِة شروقها بِضحكه حلوه مِزوقه

 بالامنيات ...

 مَرِت ساعات 

 و اخاف لَتِنسى فـ بُعدها 

 وعدها ..

 و اصبح مجرد صوره من ضِمن الصور 

 و الذكريات ... 

 مَرِت ساعات 

 و انا بَستِلِف من كل ممكِن مُحتَمَل 

 لحظِة امل .. يمكن تعود

 تِحيي الوجود

 و اسمع غُناها .. من تاني يملا

 كل السُكات ...

 مَرِت ساعات

 و القلب كارِه نبضِته

 رافض يعيش فـ غُربِته

 رافض يصَدَق إنها

 بِعدِت خلاص و فارقته

 إحساس بـ 100 مليون الم

 لما اللي كُنت بِتحلَمه

 ساعِة ماتيجي تِحققه

 يِصبَح فُتات ...

 مَرِت ساعات

 و العمر فات

 و انا لِسه بَرضو مِنتِظِر لحظِة لُقاها

 لحظِة شروقها بِضِحكه حلوه مِزوقه

 بالامنيات ...

نيجاتيف

يِضحَك قلبَك
لو تُلقطها عيونَك كادِر
صوره قديمه فـ عِز شبابها بالالوان
بتموت احزان جواك و يِشقشق
املَك فوق اليأس طاير فرحان
و كإنه غَريق لقى قشايه
فاتعَلَق بيها و راح يِحلَم
و إكمِن عيونك عدسه قديمه
مالهاش قيمه فـ وقتنا هذا
صورتَك تِبهَت ..
تلقاها نيجاتيف للماضي
فتِقفل عينَك ..

خلاص إنسيه ( أغنية )

قلبي اللي عمره ما باع فيكي و كان شاري
فـ لحظه ضاع مِنِك و انتي اللي ضيعتيه
ازاي بعد الوداع يتمنى يلقاكي
و لما يرجعلِك ... من تاني تبيعيه
قلبي خلاص انسيه و انسي انه يوم حبِك
شوفي قلب من بعديه تبيعيه و يرجعلك
اسف مانيش لعبه ولا قلبي كان مِلكِك
علشان اخليكي فـ مُر و عذاب تِرميه

مالكش الا هي َّ

 تِعافر .. تِسافر

تِشُق البحور

مالكش الا هيَّ

عيونها البَهيّه

تِزينك بِنور

تِخاصِم .. تِسامح

تِقلب ملامح وشك تلاقي

مَدَّه التلاقي

بينك و بينها

جسور و جسور

هيَّ الحقيقه 

و هيَّ السراب

هيَّ السما لِحد التراب

ماليها الشموخ

بدونها تِدوخ

و عقلك يبور

صحيح ليلها غالب

ارجع و عاتب

شموسها الحزينه

قمرها اللي كاتب

مُغلق لحين ..

ما العتمه تغور

ارسم طموحَك

ويّا طموحها

انسى جروحك

و طيّب جراحها

خليك صَبور

دا مهما تِقاسي 

فيها هتلقى

حاجات مستحيل

تِلقاها فـ غيرها

و رَبَك ساترها

ليوم القيامه

مهما الزمن

عليها يجور

دُنيتي

دُنيتي من غير عينيها

تِسوى ايه يا ناس قولولي

لمسه واحده من ايديها

بعدها راح تعذروني

ولا تنهيدة رموشها

فوق عينيها السرحانين

تِكسر الاحزان تحوشها

عن قلوب العاشقين

تِرسِم الاحلام حقيقه

تِنده الضِحكه البريئه

تِسبق الشمس تلاقيها

نور بيضحك ع الجبين

حُبها فـ القلب راسِم

دنيا اجمل م الخيال

دنيا لون خَضارعينيها

دنيا تِهزم المُحال

دنيا فيها قلبي راضي

مش مخاصِم او مِعادي

قلب عشقه رزين و هادي

قلب عاشق للجمال

دُنيتي و حياتي هي

حِسوا بيا و صدقوني

طب شوفوها بنور عينيا

بعدها راح تعذروني

رد فعلي

لكل فعل رد فعل

و رد فعلي لما قولتي

ان قلبي و كل حبي

اصبحوا احساس ممل

رد فعلي كان بِـ غِل

غِل جرحي لما فرحي

مات اصاد عينيكي و انتي

فوق الامي و انهزامي

م السعاده زرعتي فل

رد فعلي كان بِـ غِل

مش حزين ع اللي عملته

فيكى و الالم اللى سيبته

فـ حضن قلبك

و اهو من نِفسِك

تعرفي ايه معنى ذل

رد فعلي كان بِـ غِل

ماتفرحشي

 مين انت عشان فـ بعادك

يتوه قلبي و يتأثر

ماتفرحشي اوي بعنادك

مسيرك يوم هتتحسر

و تشكي للجماد و الخلق

لحد ما الكلام فـ الحلق

يضيع منك و يتبخر

و تندهلي بكل الشوق

إرجعلي انا المحقوق

دي غلطه و مش هتكرر

صحيح انا قلبي يوم حَبَك

و كانت دنيته حُبَك

و فيك عمره ما استخسر

لكن ما اقبلش اكون عاجز

اصاد غَدرَك و اقول جايز

هيجي يوم و يتغيّر

خلاص لازم كده تفارق

و اشوفك فـ الدموع غارق

و فيك انا عمري ما هافكر