و يبقى الحلم

و يبقى الحلم ليكي مَجاز

و ضلايه لكنه مَلاذ

يهد سدود حواليكي

بناها اليأس فوق ضيّك

و يكتب بالامل روايات

قصص ورديّه بِتكَسَر

ضلام حزنِك

بطلها م الشيطان منبوذ

ماهوش مبعوث

لكن راضي عليه ربِِك

و يبقى الحلم اغنيّه

و عزفة ناي بتشجيكي

في وقت النوح

يا مولوده بصوت مدبوح

انا الحلم اللى بيجيلِك

فصوني فيا ما تبيعينش

مانيش اضغاث ولا تخاريف

مانيش هوجه ولا موجه

و هتعدي كانها طيف

انا الضحكه برغم الاه

و شاعر فيكي دوِّبتيه

انا العشق اللى منِك تاااه

و مش قادره تِرجَّعي فيه

عشان لسه اسير حلمِك

عايز حقي

انا اخر كلمة بتتصدق

ساعة ما يضيق بيكي الحال

مع اني بكون اول بسمه

بتهد كيان كل محال

انا ايه بالنسبه لمعاليكي

 محتار مش عارف ارضيكي

 ولا عشان يعني بدوب فيكي

تبيعيني فريضه و انفال

محروم م الضحكه فـ احضانِك
محروم من قلبِك لو احبه
اصل انا مش باشبه سجانِك
ولا قلبي كان يشبه قلبه
و ماليش فـ الرعب و فـ الاكشن
ولا مخرج افلام إباحيّه
علشان يوصل صوتي لودنِك
فتجاوبي و تحني عليّه
انا حد ضعيف ملهوش لازمه
طاير مِتعلق فـ سماكي
دايما تلاقيه وقت الازمه
بيضحي بأحلامه فداكي
انا مش محتاج منك حاجه
غير انك تديني الفرصه
مش عايز اكون اعلى مافيكي
ولا اعمل ثروة من البورصه
انا عايز حقي كـ بني ادم
من غير تخطيط او بمُناقصه