راضي و مِتمَزِج يعني !!
بحاجات كنت بتنكرها
و حاجات كانت بتسبب
توهه فـ مُخَك و بتِقلِب
بجنون وقت ما بتشوفها
ايه غيَّر فيك ما تقولّي
ولا انتَ معاك مش فارقه
عايش و كإنك صوره
عايش و كإنك صوره
او شماعة و مكسوره
مِتعلق فوقها وشوش
كومبارس و بس مالوش
غير كلمه و مش مذكوره
غير كلمه و مش مذكوره
كومبارس فـ دور انسان
واخد فـ حياته بطوله
لكن فـ الاصل جبان
عايش و عينيه مذلوله
حاول كده مره تعيش
من غير كدب و تزييف
حتى لو حِلمَك كان ..
فـ الدنيا بسيط و ضعيف
احسن من انك تسجِن
فـ حياتَك جوه مُسلسل
بَطَلُه فـ الاصل مش انتَ
و ظهورَك فيه تخاطيف
ليست هناك تعليقات:
إرسال تعليق