نفس العيون
نفس الملامح
نفس المكان !!
نفس القمر فوق الشجر
عاكس ضياه
نفس المطر !!
نفس الكلام
برقه و حنان
وحشتيني ..
ياااااه
كاااام سنه
و احنا بعاد
حضن الفراق
بيضمنا
بقسوة و عناد
رجعتلك ..
فارد جناحات الامل
يمكن اشوفها مرفرفه
فوق جنتك
ساكته ليه ؟؟
ما وحشتكيش !!
ما توجعيش قلبي و ردي
ولا انتي يمكن
ما عرفتنيش
و عينيكي رافضة
كل ملامحي
مالك قوليلي ..
ايه غيرك ؟
شارده و سارحه
و كإن مات كل اللي كانوا
بيزرعوا فيكي الامان
جاوبي سؤالي
مين السبب ؟؟
و ازاي فـ لحظه يفكروا
يسقوكي م العذاب الوان
مين اللي سمم فكرهم
مين اللي غير دمهم
بميه بارده ..
و احساس جبان
و مين فـ عزك
خانك و ذلك
مزع غناكي
بناي شيطان
قتل رضاكي
كسر بنفسك
جاهك و مجدك
على قلبه هان
اتكلمي ...
متخافيش مني انا
مش زييهم
ولا منهم
انا حد يمكن كان بعيد
عنك فـ يوم
لكن رجع
يمحي الهموم
يشفي الوجع
يهديكي فـ كل طريق عيون
تسهر لراحتك
و فيكي تصون
مدي ايديكي ..
هتقدري
ماهو مستحيل هقدر اساعدك
و انتي رافضة
تتغيري
ايدك فـ ايدي هترجعي
تاني هنا
نفس المكان
نفس العيون
نفس الملامح
نفس القمر فوق الشجر
عاكس ضياه
نفس المطر
نفس الكلام
برقه و حنان
وااااااااااااااااااااااو روووووووووووووعة فديت من كل مشاعر
ردحذف