لملم خيوط الاسى وياك
خلاص جوايا الحزين هيبتدي يفرح
و اكتب سطورك الاخيرة
على جبين اللقا
و ودع كل ركن عشت فيه و مطرح
دور على وطن يشبهك تمام
وطن نهاره زي عتمة الليالي
و ليله سابح ف نهر آلام
يروي زهر الاهه فيك و يطرح
لملم حجاتك ... ذكرياتك
لملم فتات شيء انكسر
كان ف ليل التوهه ليك دليل
انا خلاص .....
بنيت بيني و بينك سد عالى
سميته المستحيل
بنيته بدموع و دم قلوب
كان مكتوب عليها تعشق
و انت فيها تجرح
لملم خيوط الاسى وياك
خلاص جوايا الحزين هيبتدي يفرح
ليست هناك تعليقات:
إرسال تعليق